Takimi mes presidentit të Kolumbisë, Gustavo Petro, dhe presidentit amerikan Donald Trump në Shtëpinë e Bardhë duket se ka ulur ndjeshëm tensionet mes dy vendeve, pas një viti përplasjesh publike. Biseda, që zgjati më shumë se dy orë dhe u zhvillua me dyer të mbyllura, përfundoi më mirë nga sa kishin parashikuar të dyja palët.
Nga Zyra Ovale, Trump deklaroi se takimi “shkoi shumë mirë” dhe se u arrit një marrëveshje për masa kundër trafikut të drogës. Edhe Petro u shpreh pozitiv, duke theksuar se “një rrugë lind” në marrëdhëniet dypalëshe dhe se, pavarësisht dallimeve politike, “nuk ka nevojë të zihemi”.
Presidenti kolumbian ndau edhe një shënim të firmosur nga Trump ku shkruhej: “Gustavo – Një nder i madh – e dua Kolumbinë”, së bashku me një foto të tyre duke buzëqeshur dhe shtrënguar duart.
“Patëm një takim shumë produktiv; mendova se ishte fantastik,” u tha Trump gazetarëve më vonë, duke shtuar se edhe pse nuk kishin qenë “miqtë më të mirë”, bashkëpunimi ishte i mundur. Ai shprehu gatishmëri për të punuar me Bogotán në luftën kundër trafikut të drogës, grupeve guerile dhe organizatave terroriste në rajon.
Petro, nga ana e tij, theksoi se ajo që i bashkon dy vendet është “liria”, ndërsa pranoi hapur: “Më pëlqejnë amerikanët e drejtpërdrejtë.” Ai madje i dha takimit notën 9 dhe ftoi Trump të vizitojë Kolumbinë.
Presidenti kolumbian deklaroi se i dorëzoi homologut një listë me bosë të trafikut të drogës, duke theksuar se shumë prej tyre jetojnë jashtë Kolumbisë dhe duhet të ndiqen ndërkombëtarisht. “Nëse duam të luftojmë trafikun, duhet të ndjekim bosët,” tha ai.
Takimi shërbeu për të eksploruar fusha bashkëpunimi, veçanërisht në energji dhe siguri, duke lënë pas një periudhë akuzash reciproke që kishte çuar marrëdhëniet pranë një përplasjeje diplomatike.
Megjithatë, vizita u zhvillua pa protokollin e zakonshëm të një vizite shtetërore, çka nënvizon se marrëdhënia është ende në proces riformatimi. Pavarësisht kësaj, fakti që dy liderët ranë dakord të dialogojnë shihet si një hap i rëndësishëm drejt stabilizimit të aleancës mes dy vendeve.
(Burimi: El Pais)
