Dhimbja në qytetin turistik Crans-Montana në Zvicër po shndërrohet në zemërim, teksa autoritetet kanë arrestuar pronarin e barit Le Constellation, ku një zjarr shkatërrues mori jetën e disa personave dhe la të tjerë të plagosur rëndë.
Jacques dhe Jessica Moretti, pronarët e lokalit, janë nën hetim për “vrasje të paqëllimshme nga neglizhenca”. Sipas burimeve për The Guardian, Jacques Moretti është arrestuar dhe mbajtur në paraburgim pas marrjes në pyetje nga prokurorët në qytetin Sion. Çifti ka mohuar çdo shkelje ligjore, duke deklaruar se janë “të shkatërruar nga pikëllimi” dhe se do të bashkëpunojnë plotësisht me hetimin.
Autoritetet besojnë se zjarri nisi në bodrumin e mbushur plot të barit, ku fishekzjarrët e vendosur mbi shishe shampanje u afruan shumë pranë tavanit, i cili dyshohet se ishte i veshur me material izolues të ndezshëm. Një video e shpërndarë në rrjete sociale tregonte një kameriere duke mbajtur fishekzjarrë në duar pak çaste para se flakët të kapnin tavanin. Ajo ishte mes viktimave që humbën jetën.
Hetimi po përqendrohet në rinovimet e bëra në lokal, mungesën e sistemeve efektive kundër zjarrit, rrugët e evakuimit dhe numrin e njerëzve që ndodheshin brenda kur shpërthyen flakët.
Në një deklaratë tronditëse, kryebashkiaku i Crans-Montanës pranoi se nuk ishte kryer asnjë inspektim sigurie që nga viti 2019, pavarësisht se ligji kërkon kontrolle të rregullta vjetore. Ai kërkoi falje publike dhe premtoi transparencë të plotë.
Ndërkohë, avokatët që përfaqësojnë familjet e viktimave kanë akuzuar autoritetet për vonesa në sigurimin e provave. Ata pretendojnë se pronarët e lokalit kanë çaktivizuar llogaritë në rrjete sociale, duke fshirë foto dhe video që mund të ndihmonin hetimin.
Tragjedia ka tronditur mbarë Zvicrën frankofone. “Të shohësh të rinj që humbin jetën në këtë mënyrë është e tmerrshme. Dhe më pas kupton se ndoshta ishte rezultat i gabimeve njerëzore dhe neglizhencës institucionale,” deklaroi një nga avokatët e familjeve.
Pas ngjarjes, autoritetet kanë nisur kontrolle masive sigurie në bare, restorante dhe klube nate në rajon, ndërsa kantone të tjera zvicerane kanë shpallur masa të reja të rrepta sigurie.
Mes pikëllimit dhe zemërimit, një dilemë po dominon diskutimin kombëtar: nëse kjo mund të ndodhë në Zvicër, atëherë ku jemi vërtet të sigurt?
(Burimi: The Guardian)
