Një ngjarje e rëndë ka tronditur sistemin e drejtësisë shqiptare këtë të hёnё në Tiranë, ku gjyqtari i Apelit, Astrit Kalaja, u vra brenda sallës së gjyqit nga shtetasi Elvis Shkambi, i cili më pas ka pritur policinё nё oborrin e gjykatёs qetёsisht.
Sipas të dhënave paraprake zyrtare, ngjarja ka ndodhur gjatë një seance gjyqësore në ambientet e Gjykatës së Apelit të Juridiksionit të Përgjithshëm, ku autori, i cili ishte palë në proces, ka nxjerrë armën dhe ka qëlluar në drejtim të gjyqtarit Kalaja, dhe dy personave tё tjerё palё kundёrshtare tё tij nё gjyq.
Në deklaratën zyrtare të Policisë së Shtetit thuhet se autori është vënë në pranga në vendin e ngjarjes dhe arma e krimit është sekuestruar. Grupi hetimor, nën drejtimin e Prokurorisë së Tiranës, po punon për zbardhjen e plotë të rrethanave dhe motivit të vrasjes.
Ngjarja ka tronditur opinionin publik dhe ka ngjallur reagime të menjëhershme nga komuniteti gjyqësor. Trupa gjyqësore e Gjykatës së Apelit e ka cilësuar vrasjen e kolegut si “një goditje të rëndë për sistemin e drejtësisë dhe për gjithë shoqërinë”, duke kërkuar masa të menjëhershme për forcimin e sigurisë në institucionet gjyqësore dhe ndalimin e gjuhës së urrejtjes ndaj gjyqtarëve.
Ngjarja e sotme ngre shqetësime serioze mbi sigurinë në ambientet e gjykatave, funksionimin e mekanizmave të kontrollit dhe mbrojtjes së trupës gjyqësore, si dhe mbi besimin në institucionet e drejtësisë. Ndërkohë, hetimet pritet të hedhin dritë mbi motivet që çuan Elvis Shkambin në këtë akt ekstrem, i cili ka shënuar një nga episodet më të rënda të dhunës ndaj një përfaqësuesi të sistemit gjyqësor në vend.
