Me një buzëqeshje të lodhur, por triumfuese, Aurélien Fontenoy tha vetëm: “Më në fund, ia dola!”. Ylli francez i TikTok dhe ish-kampion i biçikletave malore ka hyrë në historinë e sportit këtë fundjavë, pasi ngjiti me biçikletë 686 shkallët e Kullës Eiffel në një kohë rekord prej 12 minutash e 30 sekondash, duke thyer rekordin e mëparshëm të vendosur në vitin 2002 nga Hugues Richard me pothuajse shtatë minuta diferencë.
Fontenoy, i cili nuk lejohej të prekte tokën me këmbë gjatë gjithë ngjitjes, u përball me një nga sfidat më të pazakonta të sporteve ekstreme. “Për këtë sfidë, nuk kam amortizatorë – biçikleta është krejtësisht e ngurtë. Më duhet të kompresoj gomën, të frenoj dhe të kërcej, kërcej, kërcej pa pushim,” tregoi ai për CNN Sports.
Ngjitja drejt katit të dytë të monumentit më të famshëm të Francës ishte kulmi i viteve të stërvitjes fizike intensive dhe i një projekti që kishte nisur katër vjet më parë. “Isha gati ta bëja që në vitin 2021, por gjithçka u shty për shkak të Covid-it, Lojërave Olimpike dhe punimeve të rilyerjes së Kullës Eiffel. Ishte shumë e vështirë për t’u organizuar,” shpjegon Fontenoy.
Për 35-vjeçarin, që është tërhequr nga garat profesionale të biçikletës malore pesë vite më parë, kjo nuk ishte vetëm një sfidë personale, por edhe një mënyrë për të promovuar sportin e tij përmes rrjeteve sociale.
“Në sporte të vogla si ‘bike trial’, është e vështirë të jetosh vetëm nga garat. Duhet të gjesh mënyra të tjera, si për shembull krijimi i përmbajtjeve për publikun dhe sponsorët,” tha ai. Me mbi një milion ndjekës në TikTok dhe YouTube, Fontenoy është kthyer në një figurë frymëzuese që ndërthur sportin me krijimtarinë digjitale.
Pas triumfit në Kullën Eiffel, ҫiklisti francez nuk ka ndërmend të ndalet. “Plani im është të ngjitem në kullat më të larta të botës. Jam tashmë në kontakt me disa prej tyre. Synimi final? Burj Khalifa, kulla më e lartë në botë.
Në një botë ku rekordet shpesh përsëriten, Aurélien Fontenoy tregoi se fryma njerëzore për të sfiduar kufijtë fizikë e krijues mbetet e pakufizuar – dhe ndonjëherë, mjaftojnë vetëm një biçikletë, 686 shkallë dhe shumë guxim për të lёnё gjurmё nё histori.
