Tё menduarit e shumtё është një përvojë që shumë njerëz e njohin mirë: një rreth vicioz pyetjesh si “Po sikur?” apo “Ndoshta…”, që vijnë njëra pas tjetrës dhe e mbushin mendjen me shqetësim. Ky proces mund të duket si një stuhi e brendshme – lodhëse, e paqartë dhe shpesh e vështirë për t’u ndalur – që rrit ankthin dhe dobëson ndjesinë e kontrollit mbi jetën.
Sipas një publikimi në faqen Global English Editing, ekzistojnë disa teknika psikologjike të thjeshta që mund të ndihmojnë në uljen e kësaj mbingarkese mendore dhe në rikthimin e qetësisë. Ekspertët përmendin tetë mënyra praktike që ndihmojnë për të ndërprerë spiralen e mendimeve të tepërta.
Një nga metodat më të menjëhershme është sinkronizimi i frymëmarrjes. Frymëmarrja e thellë, mbajtja e saj dhe nxjerrja gradualisht në intervale të barabarta prej rreth katër sekondash mund të ndikojë drejtpërdrejt në gjendjen mendore. Ky ritëm ndihmon trupin të qetësohet dhe e shpërqendron mendjen nga cikli i mendimeve të pafundme.
Një tjetër teknikë është shkarkimi i mendimeve në letër. Shumë njerëz grumbullojnë në mendje informacione, detyra dhe emocione derisa ato krijojnë një “stuhi” të brendshme. Shkrimi i mendimeve urgjente, i problemeve apo i gjërave që duhet të bëhen ndihmon për të vendosur rend dhe për të lehtësuar presionin mendor.
Ekspertët sugjerojnë gjithashtu përqendrimin te momenti i tanishëm, një teknikë e njohur si “mindfulness”. Kjo bëhet duke përdorur pesë shqisat: të identifikoni pesë gjëra që shihni, katër tinguj që dëgjoni, tre gjëra që prekni, dy aroma që ndjeni dhe një shije. Ky ushtrim e rikthen mendjen te momenti aktual dhe e pengon atë të endet mes të shkuarës dhe të ardhmes.
Në një botë të mbushur me informacione, edhe distancimi nga ekranet, i njohur si “detoks digjital”, mund të jetë shumë i dobishëm. Edhe një pushim i shkurtër nga telefonat, rrjetet sociale apo lajmet mund t’i japë trurit një pauzë nga fluksi i vazhdueshëm i stimujve.
Një tjetër hap i rëndësishëm është ndryshimi i dialogut të brendshëm. Shpesh mendimi i tepërt ushqehet nga një zë kritik brenda nesh që i zmadhon gabimet dhe pasiguritë. Zëvendësimi i këtij dialogu me një qasje më të dhembshur – si p.sh. “Është në rregull të bëj gabime, po mësoj” – ndihmon në uljen e ankthit.
Aktiviteti fizik është gjithashtu një mënyrë e fuqishme për të qetësuar mendjen. Ecja e shpejtë, vrapi ose çdo formë ushtrimi krijon një ritëm në trup që gradualisht sinkronizon edhe mendimet, duke rikthyer ndjenjën e kontrollit dhe qetësisë.
Ekspertët sugjerojnë edhe zhvendosjen e fokusit drejt mirënjohjes. Kur mendimet bëhen të tepërta, mendja priret të përqendrohet te gjërat negative. Shkrimi i disa gjërave për të cilat ndiheni mirënjohës mund të ndryshojë këtë perspektivë dhe të sjellë emocione më pozitive.
Në fund, një element thelbësor është pranimi i papërsosmërisë. Përpjekja për perfeksion krijon pritshmëri të pamundura dhe rrit presionin psikologjik. Kur pranojmë se jeta nuk është perfekte dhe se nuk kemi gjithmonë të gjitha përgjigjet, mendja lirohet nga një pjesë e madhe e këtij stresi.
Kombinimi i këtyre teknikave nuk garanton një jetë pa shqetësime, por sipas ekspertëve ato ofrojnë mënyra të thjeshta dhe të arritshme për të qetësuar mendjen dhe për të rikthyer qetësinë e brendshme – edhe në mes të një “stuhie” mendimesh.
(Burimi: The Jerusalem Post)
