Një punonjës transgjinor i National Security Agency (NSA) ka ngritur një padi kundër administratës së Donald Trump, duke kërkuar bllokimin e një urdhri ekzekutiv presidencial dhe politikash të tjera që, sipas padisë, shkelin ligjin federal për të drejtat civile.
Sipas raportimit të The Washington Post, padia lidhet drejtpërdrejt me një urdhër ekzekutiv që kërkon nga qeveria federale të njohë vetëm dy gjini “të pandryshueshme” – mashkullin dhe femrën – në të gjitha operacionet, dokumentet zyrtare dhe materialet e shtypura.
Dokumenti ligjor është depozituar të hënën, më 22 dhjetor, në një gjykatë federale në shtetin e Maryland-it. Sipas padisë, urdhri i presidentit “deklaron se është politikë e qeverisë së Shteteve të Bashkuara të mohojë vetë ekzistencën” e paditëses, znj. O’Neill, duke e përjashtuar atë nga mbrojtja ligjore dhe institucionale që garantohet nga legjislacioni federal.
Në padi thuhet se këto politika jo vetëm që cenojnë dinjitetin personal dhe identitetin gjinor të punonjëses, por krijojnë edhe një ambient diskriminues në vendin e punës, në kundërshtim me ligjet ekzistuese për barazinë dhe mbrojtjen nga diskriminimi.
Rasti pritet të hapë një debat të gjerë ligjor dhe politik mbi të drejtat e personave transgjinorë në administratën federale amerikane, si dhe mbi kufijtë e kompetencave presidenciale në përcaktimin e politikave që prekin identitetin gjinor dhe të drejtat civile.
(Burimi: TGCOM)
