Një ngjarje e rëndë ka ndodhur gjatë një parade dritash të Krishtlindjeve në qytetin Nunspeet, në lindje të Holandës, ku një automjet u përplas me një grup njerëzish të pranishëm në aktivitet, duke plagosur të paktën nëntë persona.
Policia lokale e ka cilësuar incidentin si “serioz”, por ka theksuar se, sipas të dhënave paraprake, nuk ka indicie që bëhet fjalë për një akt të qëllimshëm. Autoritetet kanë deklaruar se ngjarja “nuk duket të jetë rezultat i një veprimi të vullnetshëm”, duke sugjeruar se kemi të bëjmë me një aksident.
Sipas konfirmimeve zyrtare, nëntë persona kanë mbetur të lënduar, tre prej tyre në gjendje të rëndë. Ekipet e emergjencës reaguan menjëherë, me disa ambulanca dhe helikopterë mjekësorë të angazhuar në vendngjarje për transportimin e të plagosurve dhe ofrimin e ndihmës së shpejtë.
Hetimet për shkaqet dhe rrethanat e incidentit janë ende në vijim, ndërsa autoritetet po punojnë për të sqaruar plotësisht se çfarë çoi në këtë përplasje gjatë një aktiviteti festiv që kishte mbledhur dhjetëra qytetarë.
(Burimi: ANSA)
