Përmbajtja ekstremiste dhe propaganda supremaciste e bardhë po ndikon gjithnjë e më shumë te adoleshentët në Azinë Juglindore, duke shtuar shqetësimet e autoriteteve për sulme të mundshme të dhunshme të frymëzuara nga ideologjitë e ekstremit të djathtë.
Alarmi u ngrit pasi policia në Indonezi arrestoi një adoleshent të dyshuar për një sulm me bombë në kampusin e shkollës së tij të mesme në Xhakartë në nëntor. Sulmi, i cili plagosi 96 persona, besohet të jetë rasti i parë në vend i frymëzuar nga ideologjia supremaciste e bardhë.
Sipas policisë indoneziane, të paktën 97 të rinj – disa vetëm 11 vjeç – janë aktualisht nën monitorim, pasi dyshohet se janë radikalizuar nga përmbajtje në internet që glorifikon dhunën masive dhe supremacizmin e bardhë. Dy prej tyre dyshohet se po planifikonin akte të tjera dhune pas sulmit në Xhakartë.
Fenomeni nuk kufizohet vetëm në Indonezi. Autoritetet e sigurisë në Singapor, Malajzi, Tajlandë dhe Filipine po përballen me një rritje të rasteve të adoleshentëve që frymëzohen nga sulmues të njohur të ekstremit të djathtë, si autori i sulmit ndaj xhamive në Christchurch të Zelandës së Re në vitin 2019, Brenton Tarrant.
Në Singapor, agjencia e inteligjencës së brendshme ka ndaluar katër të rinj që nga viti 2020, pasi dyshohet se kishin përqafuar ideologji ekstremiste të djathta dhe po planifikonin sulme. Ekstremizmi i djathtë është cilësuar tashmë si një nga kërcënimet kryesore për sigurinë e vendit.
Autoritetet theksojnë se asnjë nga adoleshentët e përfshirë në këto raste nuk është i bardhë. Disa prej tyre besonin se po mbronin përbërjen etnike ose fetare të vendeve të tyre, ndërsa të tjerë thjesht ishin frymëzuar nga dhuna e sulmuesve të ekstremit të djathtë.
Sipas hetimeve, shumica e të rinjve janë radikalizuar përmes rrjeteve sociale dhe komuniteteve online, veçanërisht në aplikacionin e mesazheve Telegram, ku shpërndahen meme, video dhe materiale që glorifikojnë autorët e sulmeve masive.
Këto grupe online u ofrojnë të rinjve një ndjenjë përkatësie, ndërsa përmbajtja ekstremiste shpesh nuk hiqet menjëherë nga platformat.
Nga ana tjetёr, Telegram deklaroi se bashkëpunon me autoritetet dhe se heq çdo përmbajtje që shkel rregullat e platformës, duke theksuar se thirrjet për dhunë janë të ndaluara.
Propaganda ekstremiste është përhapur edhe në platforma të tjera si TikTok, shpesh e përshtatur me kontekst lokal. Në disa video shfaqen simbole naziste ose meme raciste të shoqëruara me kode si “TCD” ose “TRD”, që sipas ekspertëve mund të nënkuptojnë thirrje për dhunë ndaj komuniteteve të caktuara etnike.
Pas pyetjeve nga Reuters, TikTok njoftoi se kishte hequr disa nga këto përmbajtje dhe theksoi se platforma nuk lejon propagandë që nxit urrejtje apo dhunë.
Ekspertët paralajmërojnë se radikalizimi i të rinjve në internet shpesh lidhet me ndjenjën e izolimit social dhe zhgënjimit personal. Shumë nga adoleshentët e përfshirë në këto raste përshkruhen si individë të vetmuar që gjejnë identitet dhe status brenda komuniteteve online ekstremiste.
Radikalizimi përmes internetit nuk është më një fenomen i kufizuar në rajone të caktuara. Përmbajtja ekstremiste qarkullon në të njëjtat platforma sociale që përdoren nga të rinjtë në mbarë botën, duke e bërë fenomenin potencialisht global.
Edhe vende të vogla si Shqipëria nuk janë imune ndaj këtij rreziku, pasi propaganda ekstremiste dhe komunitetet online që e shpërndajnë atë mund të arrijnë tek çdo përdorues përmes algoritmeve dhe rrjeteve sociale.
(Burimi: Reuters)
