Simon Cowell, një nga figurat më të njohura të televizionit dhe industrisë së muzikës, ka habitur fansat me një rrëfim krejt të papritur për jetën e tij personale. Në dokumentarin e ri të Netflix-it, The Next Act, i cili e ndjek gjatë kërkimit për talente të reja dhe në jetën familjare me partneren Lauren Silverman dhe djalin e tyre Eric, Cowell pranon se ka përjetuar një ndryshim të madh shpirtëror. Ai thotë se sot lutet çdo natë dhe beson thellë te Zoti, engjëjt mbrojtës dhe tek energjitë e universit. Për të, jeta ka marrë një dimension të ri që e bën të ndihet më i qetë dhe më i lidhur me veten.
Vetë Cowell flet edhe për transformimin e tij fizik, i cili ka qenë po aq i komentuar sa ai shpirtëror. Ai ndjek një rutinë të rreptë që përfshin katër dushe në ditë, aktivitet fizik të përditshëm dhe një dietë me vetëm 1,000 kalori. Ka hequr dorë nga sheqeri, bulmeti, mishi i kuq dhe gluteni, dhe praktikon agjërim me ndërprerje. Cowell thekson se humbja e peshës nuk ka ardhur nga ilaçe dobësimi, por vetëm nga disiplina dhe puna e vazhdueshme. Edhe për ndërhyrjet estetike, ai sqaron se ka përdorur Botox në të shkuarën, por është penduar dhe i ka ndërprerë, duke mohuar zërat se ka bërë operacione plastike.
Përsa i përket jetës sentimentale, ai duket më i vendosur se kurrë për të bërë hapin e madh me Lauren Silverman, me të cilën ka ndërtuar një familje të qëndrueshme e të lumtur. Edhe pse thotë se martesa do të jetë private, lë të kuptohet se është çështje kohe.
Simon Cowell, dikur i ashpër dhe i pakompromis në ekran, shfaqet sot si një njeri më i butë, më reflektiv dhe më i lidhur me vlerat shpirtërore. Një Simon krejt ndryshe — që fansat nuk e kishin parë kurrë më parë.
(Burimi: Daily Mail)
