Në një moment historik për Hollywood-in dhe teknologjinë, Disney njoftoi të enjten një marrëveshje të madhe me OpenAI, duke pranuar që personazhet e saj ikonike të përdoren në Sora — platformën e videove të shkurtra të inteligjencës artificiale. Video të krijuara me Sora do të shfaqen edhe në Disney+, si pjesë e një partneriteti tre vjeçar.
Disney po shkon edhe më tej: kompania do të blejë një pjesë prej 1 miliard dollarësh të aksioneve të OpenAI dhe ka në plan të bëjë edhe investime të tjera. Gjiganti i argëtimit thotë se bashkë me OpenAI do të krijojë “produkte, mjete dhe eksperienca të reja”, si dhe do ta “dislokojë” ChatGPT për punonjësit e vet.
Shefi ekzekutiv Bob Iger tha se ky hap është një pikë kthese për industrinë e argëtimit:
“Përparimet e shpejta të inteligjencës artificiale shënojnë një moment të rëndësishëm për industrinë tonë, dhe përmes këtij bashkëpunimi ne synojmë të zgjerojmë në mënyrë të përgjegjshme fuqinë e tregimit tonë.”
Disney bëhet kështu studioja e parë e madhe e Hollywood-it që ndërmerr një hap të tillë. Prej dy vitesh, studiot si Disney, Universal e Warner Bros. Discovery janë përballur me dilema të mëdha rreth përdorimit të A.I.-së: si ndërtohen këto teknologji, si kompensohen mbajtësit e të drejtave të autorit dhe si reagojnë sindikatat e industrisë.
Disney dhe Universal janë aktualisht në proces gjyqësor kundër Midjourney, gjeneruesit të famshëm të imazheve me A.I., duke e akuzuar se lejon krijimin e figurave që “kopjojnë hapur” personazhet e tyre. Midjourney i ka mohuar akuzat, duke thënë se përdorimi bie nën “fair use”.
Marrëveshja e re me OpenAI nuk përfshin përdorim të zërave apo pamjeve të aktorëve — një detaj që tregon se Disney po ecën me kujdes, duke u përpjekur të shmangë një përplasje tjetër me komunitetin krijues në Hollywood.
(Burimi: The New York Times)
