Teksa telefonat inteligjentë, tabletët dhe rrjetet sociale po bëhen pjesë e jetës së fëmijëve që në moshë shumë të vogël, Singapori ka vendosur të ndërmarrë një nismë kombëtare për të ndihmuar prindërit të kontrollojnë kohën që fëmijët kalojnë para ekranit dhe të krijojnë zakone më të shëndetshme digjitale.
Kryeministri i Singaporit prezantoi fushatën “Screen Smart From The Start” (“Të mençur me ekranet që nga fillimi”), një program kombëtar që synon të ndihmojë familjet të menaxhojnë më mirë aktivitetet digjitale të fëmijëve dhe adoleshentëve.
Sipas zyrës së kryeministrit, nisma do t’u ofrojë prindërve udhëzime konkrete për përdorimin e teknologjisë në mosha të ndryshme, me qëllim reduktimin e varësisë nga ekranet dhe mbrojtjen e fëmijëve nga përmbajtjet e papërshtatshme në internet.
Qeveria do t’u vërë në dispozicion prindërve mjetet dhe informacionin e nevojshëm për të ndërtuar zakone të shëndetshme digjitale tek fëmijët që në moshë të hershme.
Në kuadër të programit është krijuar edhe platforma online “Be Screen Smart”, ku prindërit mund të gjejnë këshilla të ndara sipas grupmoshave: nga 0 deri në 6 vjeç, nga 7 deri në 12 vjeç dhe nga 13 deri në 18 vjeç.
Portali ofron udhëzime se si të filtrohet përmbajtja që shohin fëmijët në internet, si të vendosen rregulla familjare për përdorimin e pajisjeve elektronike dhe si të mbrohen të miturit nga materialet e papërshtatshme dhe ndërveprimet toksike në rrjetet sociale.
Mes rekomandimeve kryesore të fushatës janë disa rregulla të thjeshta, por që ekspertët i konsiderojnë shumë efektive: ndalimi i telefonave gjatë vakteve familjare, mosmbajtja e telefonit në dhomën e gjumit gjatë natës dhe shtyrja sa më gjatë e momentit kur fëmija pajiset me smartphone.
Nisma parashikon gjithashtu promovimin e aktiviteteve jashtë ekranit. Portali do të publikojë vazhdimisht ide dhe aktivitete familjare në natyrë, sportive dhe kulturore për fëmijë të të gjitha moshave, duke nisur nga pushimet shkollore të verës.
Debati për kohën që fëmijët kalojnë para ekranit po zhvillohet sot në shumë vende të botës, përfshirë edhe Shqipërinë, ku është bërë e zakonshme të shohësh fëmijë shumë të vegjël me telefon në dorë në restorante, kafene, automjete apo ambiente publike.
Ekspertët paralajmërojnë se përdorimi i pakontrolluar i telefonave dhe rrjeteve sociale mund të ndikojë në përqendrimin, gjumin, zhvillimin emocional dhe marrëdhëniet sociale të fëmijëve.
Pikërisht për këtë arsye, Singapori po përpiqet ta trajtojë çështjen jo si një problem individual të familjeve, por si një sfidë kombëtare që kërkon edukim, ndërgjegjësim dhe rregulla të qarta që në vitet e para të jetës.
