Një sulm i dyshuar kibernetik ka goditur shërbimin postar të France, duke shkaktuar ndërprerje të dorëzimit të pakove dhe shërbimeve online në një nga periudhat më të ngarkuara të vitit, pragun e Krishtlindjeve. Incidenti ka prekur La Poste, si edhe degën e saj bankare, La Banque Postale.
Sipas një njoftimi zyrtar, La Poste bëri të ditur se një sulm i tipit DDoS (Distributed Denial of Service) i ka bërë shërbimet online të paarritshme. Kompania theksoi se nuk ka pasur ndikim në të dhënat e klientëve, por se sulmi ka shkaktuar vonesa dhe bllokime në shpërndarjen e postës dhe pakove.
Në disa zyra postare në Paris, të zbukuruara për festat dhe zakonisht shumë të frekuentuara këtë periudhë, punonjësit janë detyruar të kthejnë mbrapsht klientët e irrituar që prisnin të dërgonin ose të merrnin pako, përfshirë dhurata të Krishtlindjeve. Ndërkohë, klientët e La Banque Postale nuk kanë mundur të përdorin aplikacionin për të miratuar pagesa apo për të kryer shërbime të tjera bankare, ndërsa banka ka ridrejtuar përkohësisht miratimet përmes mesazheve SMS.
“Ekipet tona janë të angazhuara për ta zgjidhur situatën sa më shpejt të jetë e mundur”, njoftoi banka përmes rrjeteve sociale. Deri më tani, askush nuk ka marrë përgjegjësinë për sulmin.
Ky incident vjen vetëm një javë pasi qeveria franceze u bë objekt i një tjetër sulmi kibernetik që goditi Ministrinë e Brendshme, përgjegjëse për sigurinë kombëtare. Në atë rast, sipas autoriteteve, u nxorën disa dhjetëra dokumente sensitive dhe u sigurua akses në të dhëna që lidhen me regjistra policorë dhe persona në kërkim. Mediat franceze raportuan se për këtë rast është ndaluar një 22-vjeçar.
Gjithashtu, javën e kaluar, prokurorët francezë njoftuan se agjencia e kundërspiunazhit po heton një tjetër plan të dyshuar sulmi kibernetik, që synonte marrjen nën kontroll nga distanca të sistemeve kompjuterike të një trageti ndërkombëtar pasagjerësh. Një anëtar i ekuipazhit, shtetas letonez, ndodhet në paraburgim, i dyshuar se ka vepruar për llogari të një fuqie të huaj të paidentifikuar.
Franca dhe disa vende të tjera evropiane aleate të Ukrainës kanë akuzuar Rusinë për zhvillimin e asaj që e quajnë “luftë hibride”, përmes sabotimeve, sulmeve kibernetike, dezinformimit dhe veprimeve të tjera armiqësore, të cilat shpesh janë të vështira për t’u atribuar menjëherë.
(Burimi: France 24, në bashkëpunim me Associated Press)
