Këshilli bashkiak në Sydney ka ndaluar hipjen në autobusёt e linjёs publike për personat që janë pa bluzë ose tё veshur vetëm me bikini, duke rikthyer debatin e vjetër në Australi mbi kufijtë e mirësjelljes dhe veshjes etike në hapësirat publike.
“Ju lutemi të visheni siç duhet. Duhet të mbani rroba mbi rrobat e plazhit,” thuhet në një tabelë të vendosur në autobusin Hop, Skip and Jump, i financuar nga Këshilli i Northern Beaches dhe që qarkullon në zonat bregdetare Manly, Fairlight dhe Balgowlah.
Autobusi është një nga mjetet kryesore të transportit publik në këtë rajon, ndërsa vendimi për t’u mohuar udhëtimin pasagjerëve për shkak të veshjes do të lihet në diskrecionin e shoferit.
Ndryshimi erdhi pas ankesave të disa udhëtarëve, ku shumë persona të moshuar e mbështetën kufizimin. “Jemi pak tradicionalë. Do të donim që njerëzit të visheshin siç duhet, sidomos në transport publik,” tha një grua për mediat lokale. Një tjetër e përshkroi praninë e pasagjerëve me rroba plazhi si “tronditëse”, duke theksuar se autobusi është “i vogël dhe shumë i mbyllur”.
Edhe disa burra u shprehën se është “pak e pakëndshme” të shohësh njerëz që hipin “praktikisht pa rroba”. Megjithatë, jo të gjithë janë dakord. Një e re ngriti pyetjen se “ku vendoset kufiri”, duke vënë në dukje se shumë pasagjerë udhëtojnë me veshje sportive që janë po aq ekspozuese.
Këshilli nuk e ka përfshirë ende rregullin e ri në kodin zyrtar të sjelljes për shërbimin e autobusit, i cili aktualisht ndalon ngrënien, pirjen e duhanit apo hipjen me objekte të mëdha si dërrasat e sërfit kur mjeti është plot.
Debatet mbi veshjet e plazhit nuk janë të reja në Australi. Në fillim të viteve ’60, tensionet mes pushuesve dhe autoriteteve në periferi të Sydneyt u quajtën madje “lufta e bikinive”, pasi mbi 50 gra u arrestuan në Bondi Beach për shkelje të rregullave strikte mbi përmasat e kostumeve të banjës. Edhe pse këto rregulla u hoqën më vonë, diskutimet për atë që konsiderohet veshje e përshtatshme vazhdojnë.
Së fundmi, një propozim në vitin 2024 për të ndaluar bikinit tip “tanga” në rrugët e Gold Coast shkaktoi protesta dhe një debat mbarëkombëtar, duke treguar se çështja e lirisë personale dhe normave publike mbetet ende e ndjeshme në vend.
(Burimi: CNN)
