Në shumë qytete të botës, po lind një mënyrë e re për t’u argëtuar: festat pa alkool. Ato duken si çdo festё nate tjetër — drita, bas i fortë, kostume të çuditshme, njerëz që kërcejnë qull në djersë — por me një ndryshim thelbësor: askush nuk pi. Party-t zhvillohen në mes të ditës ose në agim dhe synojnë t’u japin njerëzve atmosferën e natës, pa pasojat që sjell alkooli.
Në Londër, “House of Happiness”, hapur në vitin 2022, është kthyer në një fenomen social për të rinjtë dhe të rriturit që kërkojnë muzikë, energji dhe komunitet, por jo substanca. Themeluesi Neil Hudson-Basing, i cili la alkoolin dhe drogat gjashtë vite më parë, thotë se ideja erdhi nga nevoja për të krijuar “një eksperiencë të vërtetë ‘clubbing’, por pa asnjë stimulues kimik”. Në eventet e tyre kanë marrë pjesë njerëz nga mosha 20 deri në 80 vjeç — një provë se argëtimi nuk ka moshë dhe nuk ka nevojë për gotë në dorë për të qenë i denjë.
Trendi nuk kufizohet vetëm në Londër. Në Singapor, festat me çaj matcha po marrin famё. Në SHBA, koncepti “soft clubbing” po rritet me shpejtësi — platforma Eventbrite në vitin 2024raportoi një rritje 92% të eventeve tё kёsaj natyre, qё i reklamojnё me sloganin “je kurioz tё jesh esёll?”. Në Paris, Berlin dhe Amsterdam, po ashtu, skena elektronike ka nisur të eksperimentojë me festa pa alkool.
Një nga pionierët e këtij fenomeni është “Morning Gloryville”, që prej 2013 organizon festa të agimit me yoga, meditim dhe muzikë elektronike. Sipas drejtueses Roxy Deniz Ozalp, qëllimi është të krijojnë ambiente të sigurta dhe pozitive, ku njerëzit mund të kërcejnë lirisht, pa presionin e alkoolit apo drogës. Për shumë prej pjesëmarrësve, këto festa kanë efekte të forta pozitive në shëndetin mendor — studimet tregojnë se vallëzimi në grup nxit energjinë, ndjenjën e përkatësisë dhe ul stresin.
Po pse njerëzit po zgjedhin të festojnë pa alkool?
Shifrat tregojnë se konsumi i tij po bie ndjeshëm, sidomos te brezi i ri. Në SHBA, vetëm 18–20% e të rinjve nën 28 vjeç konsumojnë rregullisht alkool. Në Mbretërinë e Bashkuar, 39% e të rinjve 18–24 vjeç nuk pinë fare. Një pjesë thonë se alkooli i pengon të krijojnë lidhje të vërteta sociale; të tjerë se festat tradicionale ndihen të pasigurta ose të lodhshme.
Për shumë prej atyre që e kanë lënë alkoolin pas, rikthimi në skenën e natës është i vështirë. DJ Ali, 32 vjeç, thotë se “tё qёnurit esёll ishte izolues në fillim”, sepse klubet tradicionale i dukeshin të zhurmshme dhe të ankthshme pa gotën në dorë. Festat pa alkool e ndihmuan të rikthehej tek muzika dhe komuniteti pa rrezikuar mirëqenien.
Por në këto evente ka vend edhe për njerëz që thjesht nuk duan të pijnë atë ditë. “Nuk jam krejtësisht pro, se më pëlqen alkooli,” thotë Karli, 40 vjeçe. “Por këtu ndihem e sigurt dhe e lumtur. Në klubet normale, gjithmonë ka një rrezik — këtu fundi është gjithmonë pozitiv.”
Organizatorët thonë se energjia në këto festa është madje më e fortë. “Njerëzit kërcejnë më shpejt, sepse nuk presin efektin e alkoolit,” shpjegon Hudson-Basing. “Dhe kjo është çmenduri e bukur.”
Sipas tyre, festat pa alkool nuk do ta zëvendësojnë kulturën tradicionale të klubeve, por mund të ofrojnë alternativa më të shëndetshme, më të sigurta dhe po aq argëtuese.
(Pёrshtatur nga CNN)
