Një tërmet me magnitudë 4.8 të shkallës Rihter ka goditur juglindjen e Kosovës mbrëmjen e së martës, rreth orës 22:05. Epiqendra e tërmetit ishte në zonën midis Prizrenit dhe Shtërpcës, me një thellësi hipoqendrore prej 5 kilometrash. Lëkundjet u ndjenë fuqishëm në disa qytete të Kosovës, përfshirë Prishtinën, si dhe në rajone të Maqedonisë së Veriut dhe Serbisë.
Sipas Agjencisë për Menaxhimin e Emergjencave (AME), tërmeti kishte potencial për të rrezikuar qytetarët dhe për të shkaktuar dëme materiale të lehta. Deri më tani, nuk ka raportime për dëme serioze apo persona të lënduar. Institucionet përgjegjëse janë në gatishmëri të plotë dhe po e monitorojnë situatën në vazhdimësi.
Në Prizren, një qytetar raportoi për dëme materiale në një market, ku produktet dhe raftet brenda ndërtesës ranë si pasojë e lëkundjeve. Në Prishtinë, qytetarët u panë duke dalë jashtë objekteve të banimit për shkak të frikës nga pasgoditjet. Drejtori për Siguri dhe Emergjenca në Komunën e Prishtinës, Lulzim Fushtica, njoftoi se nuk ka raportime për dëme serioze apo të lënduar dhe u bëri thirrje qytetarëve të ruajnë qetësinë.
Zona e Prizrenit është një zonë sizmogjene aktive, siç paraqitet edhe në Hartën e Rrezikut Sizmik për Kosovën.
(Burimi: KOHA.net)
