Presidenti amerikan Donald Trump ka sulmuar ashpër Papa Leon e XIV për qëndrimin e tij ndaj luftës në Iran, duke deklaruar publikisht se “nuk është më tifoz” i liderit katolik dhe duke e cilësuar atë si problematik për politikën e jashtme.
Duke folur para gazetarëve, Trump u shpreh se nuk i pëlqen një papë që, sipas tij, “mendon se është në rregull që një vend si Irani të ketë armë bërthamore”. Ai shtoi se Papa është “i dobët ndaj krimit dhe i keq për politikën e jashtme”, duke e bërë edhe më të qartë distancimin e tij nga qëndrimet e Vatikanit.
Në të njëjtën linjë, Trump shkoi edhe më tej me kritikat e tij, duke thënë:
“Ai s’ishte fare në listën për t’u zgjedhur Papë, por e futën vetëm se ishte amerikan, dhe menduan që duke qenë i tillë do merrej vesh mirë me Presidentin Trump!!”
Këto deklarata vijnë në një moment kur Papa Leo XIV, papa i parë amerikan në histori, ka qenë gjithnjë e më kritik ndaj retorikës së SHBA-së dhe Izraelit në konfliktin me Iranin. Javën e kaluar, ai i cilësoi kërcënimet e Trump ndaj popullit iranian si “plotësisht të papranueshme”.
Ky reagim i Papës erdhi pasi Trump paralajmëroi se “një qytetërim i tërë mund të zhduket brenda natës” nëse Irani nuk përmbushte kërkesat amerikane, përpara arritjes së një armëpushimi dyjavor.
Në deklaratat e tij publike, Papa Leo ka kundërshtuar hapur përdorimin e fesë për të justifikuar luftën. Gjatë meshës së së Dielës së Palmave, ai theksoi:
“Jezusi është mbreti i paqes, që refuzon luftën. Askush nuk mund ta përdorë atë për të justifikuar konfliktin.”
Ky qëndrim bie ndesh me retorikën e administratës Trump, ku edhe Sekretari i Mbrojtjes Pete Hegseth ka përdorur referenca fetare për të përshkruar luftën si një mision të mbështetur hyjnisht.
Pas deklaratave të Trump, reagime nuk munguan edhe nga Vatikani. Zyrtari i lartë, prifti Antonio Spadaro, e interpretoi sulmin si një përpjekje për të goditur një zë moral që presidenti “nuk mund ta kontrollojë”.
“Trump nuk debaton me Papën – ai kërkon ta detyrojë të flasë në një gjuhë që ai e dominon. Por Papa flet një gjuhë tjetër, që refuzon logjikën e forcës dhe interesit kombëtar,” tha ai.
Papa Leo XIV ka theksuar edhe më herët se bota duhet të synojë çarmatosjen bërthamore përmes dialogut dhe respektit reciprok, duke bërë thirrje për një paqe të qëndrueshme të bazuar në drejtësi dhe solidaritet.
Deklaratat e Trump erdhën menjëherë pasi emisioni “60 Minutes” transmetoi një reportazh ku kardinalë amerikanë mbështesnin hapur qëndrimin e Papës ndaj luftës dhe kritikat e tij ndaj politikave të administratës Trump.
Në një tjetër zhvillim që ka ngjallur debat, Trump publikoi në rrjetet sociale edhe një imazh të krijuar me inteligjencë artificiale, ku ai paraqitej si një figurë e ngjashme me Krishtin, duke shëruar një të sëmurë – një veprim që është interpretuar nga kritikët si provokues në kontekstin e përplasjes me Vatikanin.
(Burimi: CNN)
