Administrata e Donald Trump ka zbuluar planet për ndërtimin e një harku monumental fitoreje në Washington DC, një projekt ambicioz që synon të ndryshojë ndjeshëm pamjen e kryeqytetit amerikan.
I quajtur “Arc de Trump”, monumenti parashikohet të jetë rreth 76 metra i lartë – më i lartë se US Capitol dhe Lincoln Memorial – dhe do të ketë elemente të theksuara ari, përfshirë një pishtar dhe një kurorë të ngjashme me atë të Statujёs sё Lirisё.
Vetë Trump e ka cilësuar projektin si “Harku i Triumfit më i madh dhe më i bukur në botë”, duke theksuar se do të jetë një simbol i qëndrueshëm për dekada. Monumenti pritet të vendoset në një pikë hyrëse simbolike në qytet, mes Arlington National Cemetery dhe Memorial Bridge, duke u frymëzuar nga Arc de Triomphe në Francë.
Sipas planit të publikuar, një pjesë e financimit do të vijë nga fondet publike, me rreth 15 milionë dollarë të parashikuar për projektin. Trump ka sugjeruar gjithashtu se fondet e mbetura nga projekte të tjera, si salla e vallëzimit e propozuar më parë, mund të përdoren për ndërtimin e harkut.
Pamjet e para të projektit tregojnë një strukturë të dekoruar me mbishkrimin “One Nation Under God” (Njё Komb nёn Zotin), të kurorëzuar me shqiponja të arta dhe të rrethuar nga statuja luanësh. Sipas Shtëpisë së Bardhë, harku synon të përkujtojë sakrificat e heronjve amerikanë përgjatë historisë 250-vjeçare të vendit.
Megjithatë, projekti përballet me kritika dhe pengesa ligjore, ashtu si edhe nisma të tjera të administratës për të riformësuar kryeqytetin, përfshirë ndryshimet në Kennedy Center dhe planet për një “Kopsht Kombëtar të Heronjve Amerikanë”.
Ndërsa Komisioni i Arteve të Bukura pritet të shqyrtojë projektin, mbetet për t’u parë nëse “Arc de Trump” do të kalojë nga ide ambicioze në realitet konkret – apo do të mbetet një tjetër projekt i diskutueshëm në skenën politike amerikane.
(Burimi: BBC)
