Një pikturë e çmuar e Vincent van Gogh po bëhet sërish objekt i një konflikti ndërkombëtar ligjor. Gjykatat e Nju Jorkut kanë rihapur çështjen për veprën “The Olive Harvest” (1889), pjesë e koleksionit të përhershëm të Fondacionit Basil & Elise Goulandris në Athinë, pasi një gjykatë në Kaliforni e kishte rrëzuar padinë fillestare në vitin 2022.
Sipas një deklarate për Agjencinë e Lajmeve Athinë-Maqedoni (ANA-MPA), një përfaqësues i muzeut theksoi se:
“Kjo është e njëjta kërkesë e paraqitur në vitin 2022, e cila u refuzua nga gjykata e Kalifornisë. Çështja tani është depozituar sërish në gjykatat e Nju Jorkut. Meqë procesi gjyqësor është në zhvillim, besojmë se është e drejtë t’i besojmë drejtësisë dhe të mos bëjmë komente të tjera.”
Paditësit janë pasardhës të Hedwig dhe Fritz Stern, koleksionistë hebrenj nga Mynihu, të cilët pretendojnë se piktura iu grabit pas arratisjes së familjes nga Gjermania naziste në vitin 1936. Ata kanë ngritur padi kundër Metropolitan Museum of Art (The Met) në Nju Jork dhe Fondacionit Goulandris në Greqi, duke kërkuar rikthimin e veprës dhe kompensim financiar.
Sipas dokumenteve gjyqësore, The Met bleu tablonë në vitin 1956 për 125 mijë dollarë përpara se ta shiste tek koleksionisti i njohur grek Basil Goulandris në vitin 1972. Trashëgimtarët e Sternëve pretendojnë se muzeu amerikan “duhej ta dinte ose kishte arsye të dinte” për origjinën e diskutueshme të veprës.
Padia e mëparshme në Kaliforni u hodh poshtë për arsye juridiksioni, por ri-depozitimi në Nju Jork e rihap një nga shumë proceset aktuale për restitucionin e veprave të artit të zhdukura ose të konfiskuara gjatë Luftës së Dytë Botërore.
Ky zhvillim vë sërish në qendër të vëmendjes çështjet e pronësisë së artit me histori lufte, duke prekur jo vetëm muzeun prestigjioz grek, por edhe një nga institucionet më të mëdha të artit në botë, The Met, në një debat të ndjeshëm që lidh trashëgiminë kulturore me drejtësinë historike.
(Burimi: Greek City Times)
