Për herë të parë është ndërtuar një hartë e plotë e rrjetit nervor të klitorit, një zhvillim që mund të ndryshojë mënyrën si kuptohet anatomia femërore dhe të përmirësojë rezultatet për gratë që i nënshtrohen ndërhyrjeve kirurgjikale në zonën e legenit.
Pothuajse tri dekada pasi u hartëzua rrjeti kompleks i nervave në penis, studiuesit më në fund kanë arritur të bëjnë të njëjtën gjë për një nga organet më pak të studiuara të trupit të njeriut. Ky zbulim jo vetëm që hedh dritë mbi mekanizmat që lidhen me kënaqësinë seksuale dhe orgazmën, por edhe sfidon disa nga njohuritë e deritanishme në mjekësi.
Klitori, megjithëse thelbësor për kënaqësinë seksuale femërore, ka mbetur për një kohë të gjatë në hije për shkak të tabuve kulturore dhe mungesës së studimeve të thelluara. Ai madje nuk u përfshi në tekstet standarde të anatomisë deri në shekullin e 20-të, ndërsa në vitin 1995 u përshkrua thjesht si një “version i vogël i penisit”.
Urologia nga Melburni, Helen O’Connell, thekson se ky organ është neglizhuar për dekada nga komuniteti shkencor dhe mjekësor, duke e lidhur këtë me një injorancë më të gjerë shoqërore ndaj seksualitetit femëror.
Për të kuptuar më mirë strukturën e brendshme të klitorit, studiuesja Ju Young Lee nga Qendra Mjekësore Universitare e Amsterdamit, së bashku me ekipin e saj, përdorën rreze X me energji të lartë për të krijuar skanime 3D të legenit të dy grave që kishin dhuruar trupin e tyre për kërkime shkencore. Rezultatet zbuluan me detaje të papara më parë një rrjet prej pesë nervash të degëzuar në formë peme, me trashësi deri në 0.7 mm.
Sipas Lee, kjo është hera e parë që realizohet një hartë 3D e nervave brenda pjesës më të ndjeshme të klitorit. Ajo e konsideron të habitshme që një arritje e tillë vjen kaq vonë, duke pasur parasysh se një nivel i ngjashëm njohurish për penisin është arritur që në vitin 1998.
Studimi tregon gjithashtu se disa prej nervave të klitorit shtrihen më larg nga sa mendohej më parë, duke arritur në zona si mons pubis, kapuçi i klitorit dhe struktura të tjera të vulvës. Ndryshe nga bindjet e mëparshme, nervi dorsal nuk dobësohet drejt fundit, por vazhdon fuqishëm deri në majë.
Ekspertët thonë se këto gjetje mund të kenë ndikim të madh në praktikën mjekësore. Një kuptim më i saktë i shpërndarjes së nervave mund të ndihmojë në shmangien e dëmtimit të tyre gjatë operacioneve në legen, duke ruajtur funksionin seksual të grave pas ndërhyrjeve.
Po ashtu, kjo njohuri mund të jetë vendimtare në kirurgjinë rindërtuese për gratë që kanë kaluar gjymtim gjenital. Sipas Organizatës Botërore të Shëndetësisë, mbi 230 milionë vajza dhe gra në botë janë prekur nga kjo praktikë, e cila nuk ka asnjë përfitim shëndetësor dhe sjell pasoja serioze fizike dhe psikologjike.
Aktualisht, rreth 22% e grave që i nënshtrohen kirurgjisë rindërtuese raportojnë ulje të kënaqësisë seksuale pas operacionit. Studiuesit besojnë se një hartë më e saktë e nervave mund të ndihmojë në uljen e këtij rreziku.
Përtej kësaj, zbulimi mund të ndikojë edhe në trajtimin e kancerit të vulvës, kirurgjinë e ricaktimit të gjinisë dhe ndërhyrjet kozmetike si labiaplastika, e cila ka parë një rritje të ndjeshme vitet e fundit.
Ndërkohë, Lee synon të çojë më tej ndërgjegjësimin duke hapur një ekspozitë kushtuar klitorit në Amsterdam, e frymëzuar nga Muzeu i Vaginës në Londër, me qëllim që ky organ të mos mbetet më në errësirë shkencore.
(Burimi: The Guardian)
