Komedia e zezë “Si ne të dy” do të vijë në skenën e Teatri Kombëtar – ArTurbina, duke sjellë për publikun një rrëfim të fortë dhe njëkohësisht ironik mbi marrëdhëniet në çift dhe sfidat e martesës.
Shfaqja vendos në qendër dy personazhe, një çift në prag të shpërbërjes së lidhjes së tyre. Përmes dialogëve të mprehtë, humorit të hollë dhe përballjeve që herë pas here marrin edhe formë fizike, vepra trajton tema universale si dashuria, tradhtia, zhgënjimi dhe konsumimi emocional. Në thelb, ajo ngre pyetje të rëndësishme mbi natyrën e martesës: kur mund të konsiderohet një marrëdhënie e shëndetshme dhe kur ajo fillon të dështojë?
“Si ne të dy” synon të përfshijë publikun në një reflektim të përbashkët mbi të vërtetat personale dhe përvojat e përbashkëta njerëzore, duke ndërthurur dramën me elementë të fortë të humorit të zi.
Shfaqja do të ketë premierën absolute në datat 22, 23, 24, 25 dhe 26 prill, çdo mbrëmje në orën 20:00.
