Dashuria është dashuri, por pasuria është tjetër gjë. Gjithnjë e më shumë gra të reja po kërkojnë nënshkrimin e një kontrate paramartesore përpara se të thonë “Po” në altar. Ajo që dikur shihej si një shenjë mosbesimi ndaj partnerit, sot po konsiderohet nga brezi i ri si një mënyrë për të mbrojtur pavarësinë financiare dhe për të shmangur konfliktet e mundshme në rast divorci.
Një reportazh i gazetës britanike The Guardian tregon se kontratat paramartesore, të njohura si prenups, po bëhen gjithnjë e më të zakonshme mes çifteve të reja, veçanërisht atyre të gjeneratёs Z.
Këto marrëveshje përcaktojnë paraprakisht se si do të trajtohen pasuritë, kursimet, bizneset dhe detyrimet financiare të bashkëshortëve nëse martesa përfundon me divorc.
Kai Amos, 30 vjeçe, është një prej grave që ka vendosur ta bëjë një marrëveshje të tillë përpara martesës me të fejuarin e saj, Garret.
Ata janë njohur që në shkollën e mesme, kanë kaluar së bashku pothuajse gjithë jetën e tyre si të rritur dhe tani po përgatiten për martesën.
Por krahas zgjedhjes së fustanit, organizimit të ceremonisë dhe listës së të ftuarve, çifti po zhvillon edhe takime me avokatë për të përcaktuar se çfarë do të ndodhë me pasuritë e tyre nëse një ditë ndahen.
Amos, e cila ka punuar në Amazon dhe më pas është bërë krijuese përmbajtjeje në rrjetet sociale, zotëron aksione dhe një portofol investimesh. Ajo po përgatitet gjithashtu të lançojë një linjë produktesh për kujdesin e lëkurës së kokës.
Për të, kontrata paramartesore nuk ka lidhje me mungesën e dashurisë.
“E dua veten aq shumë sa të mbroj veten në skenarin më të keq. Preferoj të diskutoj tani për atë që është e drejtë, me dikë që më do, sesa më vonë me dikë që më urren sepse nuk duhemi më”, shprehet ajo.
Vendimi i saj është ndikuar edhe nga përvoja e divorcit të prindërve, gjatë të cilit ka parë nga afër konfliktet që mund të lindin për ndarjen e pasurisë.
Sipas të dhënave të një sondazhi të Harris Poll, të realizuar në bashkëpunim me Bloomberg gjatë vitit 2026, 53% e amerikanëve të martuar ose të fejuar nën moshën 45 vjeç kanë nënshkruar një marrëveshje paramartesore.
Për krahasim, të dhënat e një sondazhi të mëparshëm, të cituara në vitin 2022, tregonin se 40% e personave të martuar ose të fejuar të moshës 18–34 vjeç kishin nënshkruar marrëveshje të tilla. Megjithatë, për shkak të grupmoshave të ndryshme, këto shifra nuk përbëjnë një krahasim të drejtpërdrejtë.
Një tjetër ndryshim i rëndësishëm është se kontratat paramartesore nuk kërkohen më vetëm nga burrat e pasur.
Julia Rodgers, avokate divorcesh dhe themeluese e platformës HelloPrenup, tregon se gratë iniciojnë pak më shumë se gjysmën e marrëveshjeve që përgatiten përmes platformës së saj.
Të ardhurat mesatare vjetore të përdoruesve të kësaj platforme janë rreth 78 mijë dollarë, çka tregon se interesi nuk kufizohet te milionerët.
Sipas ekspertëve, të rinjtë duan të mbrojnë jo vetëm pasuritë që zotërojnë aktualisht, por edhe ato që mund të krijojnë në të ardhmen.
Kjo përfshin biznese, investime, kriptomonedha, trashëgimi familjare dhe të ardhura nga rrjetet sociale.
Në disa raste, çiftet përcaktojnë në kontratë edhe se kujt do t’i mbeten kafshët shtëpiake pas divorcit, kush do të administrojë llogaritë e përbashkëta në rrjetet sociale dhe çfarë mund të publikojë secili për tjetrin pas ndarjes.
Chloé Daniels, 35 vjeçe, e cila jep këshilla financiare në TikTok, ka përfshirë në marrëveshjen me bashkëshortin e saj, Charles, edhe një klauzolë që parashikon penalitet financiar në rast se njëri prej tyre bën deklarata dëmtuese për tjetrin.
Sipas saj, shuma për të cilën kanë rënë dakord është 250 mijë dollarë.
Një tjetër arsye për rritjen e interesit është edhe barra e borxheve studentore. Në SHBA, miliona të rinj hyjnë në martesë me kredi të konsiderueshme, ndaj marrëveshjet paramartesore mund të përdoren për të përcaktuar përgjegjësinë për këto detyrime në rast ndarjeje.
Por ndryshimi më interesant është mënyra se si brezi i ri e percepton këtë dokument.
Ndërsa dikur një kontratë paramartesore mund të interpretohej si mungesë besimi ose si përgatitje për divorc, sot shumë çifte e konsiderojnë një bisedë të domosdoshme për paratë, përgjegjësitë dhe të ardhmen.
Për Kai Amos, procesi i hartimit të marrëveshjes ka sjellë më shumë sinqeritet në marrëdhënien me të fejuarin.
“Nëse nuk i bëni këto biseda, atëherë çfarë lloj marrëdhënieje keni?”, pyet ajo.
Edhe Chloé Daniels e konsideron kontratën paramartesore një shprehje dashurie, jo mosbesimi.
Sipas saj, edhe nëse martesa një ditë përfundon keq, të dy bashkëshortët duhet të kenë mundësinë të ndahen financiarisht në mënyrë të drejtë, pa kaluar vite të tëra në konflikte gjyqësore.
Për këto gra, kontrata paramartesore nuk do të thotë se dashuria ka një afat. Do të thotë se, edhe kur dashuria është e madhe, siguria financiare nuk duhet lënë në dorë të fatit.
Burimi: The Guardian
