Familja mbretërore britanike po shënon atë që do të kishte qenë 100-vjetori i lindjes së Mbretёreshёs Elizabeth e II-tё, me një sërë aktivitetesh përkujtimore dhe projekte të reja që nderojnë trashëgiminë e monarkes më jetëgjatë të Britanisë.
Për këtë përvjetor të veçantë, janë shpallur plane gjithëpërfshirëse për krijimin e një organizate të re bamirëse dhe ndërtimin e një memoriali të ri në qendër të Londrёs. Mbretëresha ndërroi jetë rreth katër vite më parë, në moshën 96-vjeçare.
Charles III dhe bashkëshortja e tij, Camilla, do të vizitojnë British Museum për të parë projektet e memorialit, ndërsa vajza e mbretëreshës, Anne, do të inaugurojë Kopshtin e Mbretëreshës Elizabeth tё II-tё në Regent’s Park.
Në një video të publikuar në YouTube, Mbreti Charles pritet të reflektojë mbi jetën dhe trashëgiminë e nënës së tij.
Memoriali i planifikuar do të transformojë St James’s Park, duke përfshirë një urë moderne prej qelqi që simbolizon “unitetin”, e frymëzuar nga diadema që Elizabeth mbajti në ditën e dasmës. Projekti do të përfshijë gjithashtu statuja të saj dhe të bashkëshortit të saj, Princit Philip.
Statuja e mbretëreshës do të realizohet në bronz nga skulptori Martin Jennings, e frymëzuar nga portreti i njohur i Pietro Annigoni, ku Elizabeth paraqitet me veshjen e Urdhrit të Garterit.
Përveç memorialit fizik, do të krijohet edhe një memorial dixhital me materiale arkivore nga mbretërimi i saj, ku njerëzit nga e gjithë bota do të mund të ndajnë kujtime dhe reflektime personale.
Një tjetër iniciativë është krijimi i fondacionit bamirës “The Queen Elizabeth Trust”, me një fond fillestar prej 40 milionë paundësh. Ky fond do të mbështesë projekte në komunitet, si qendrat lokale dhe hapësirat e gjelbra, duke vazhduar angazhimin e mbretëreshës për shoqërinë.
Më vonë gjatë ditës, Charles dhe Camilla do të presin në Buckingham Palace përfaqësues të organizatave bamirëse të mbështetura nga Elizabeth, si dhe persona që festojnë 100-vjetorin e tyre.
Në kuadër të përkujtimit, janë emetuar edhe pulla dhe monedha speciale, ndërsa Pallati Buckingham po organizon një ekspozitë njëmujore me koleksionin më të madh publik ndonjëherë të veshjeve të Mbretëreshës Elizabeth II.
