Byroja Federale e Hetimit (FBI) ka njoftuar se do të udhëheqë një hetim të gjerë për të zbuluar nëse ekziston ndonjë lidhje mes vdekjeve dhe zhdukjeve të tё paktën 10 shkencëtarëve dhe punonjësve qeveritarë në SHBA gjatë viteve të fundit.
Rastet, të cilat deri më tani duken të palidhura mes tyre, kanë nxitur spekulime të shumta në internet, sidomos për shkak se disa prej personave kishin punuar në projekte të ndjeshme shtetërore, përfshirë programet bërthamore apo projekte të lidhura me NASA.
Hetimi i FBI-së do të zhvillohet në bashkëpunim me Departamentin e Energjisë, Departamentin e Mbrojtjes dhe autoritetet lokale, me qëllim “gjetjen e përgjigjeve” për këto raste që kanë tërhequr vëmendje të madhe publike.
Edhe Kongresi amerikan ka hyrë në lojë. Komiteti pёr Mbikёqyrjen ka kërkuar një informim zyrtar nga institucionet kryesore, duke kërkuar sqarime për “vdekjet dhe zhdukjet e personave me akses në informacion shkencor të ndjeshëm”.
Debati u intensifikua pasi edhe Donald Trump deklaroi se çështja është diskutuar në nivelet më të larta, duke shtuar se shpreson që bëhet fjalë për rastësi, por se e vërteta do të dalë së shpejti.
“Shpresoj të jetë diçka rastësore, por do ta dimë brenda një jave e gjysmë. Është një çështje serioze,” tha ai.
Një nga rastet që ka nxitur më shumë diskutime është zhdukja e Neil McCasland, një ish-gjeneral i Forcave Ajrore, i cili u zhduk në vitin 2026 nga shtëpia e tij në New Mexico. Ai kishte lënë pas telefonin dhe syzet, ndërsa dyshohet se kishte marrë me vete disa sende personale përpara se të largohej.
Megjithatë, familjarët e tij kanë hedhur poshtë teoritë konspirative, duke theksuar se ai kishte dalë në pension prej më shumë se një dekade dhe nuk kishte akses në sekrete të ndjeshme.
Një tjetër rast i pazgjidhur është zhdukja e Monica Reza, një ish-shkencëtare e NASA-s dhe eksperte e materialeve raketore, e cila u raportua e humbur në vitin 2025 gjatë një ecjeje në Kaliforni.
Ndërkohë, vrasja e studiuesit të njohur Carl Johann Grillmair dhe disa raste të tjera të mëparshme kanë shtuar edhe më shumë dyshimet, megjithëse autoritetet nuk kanë gjetur ende prova që i lidhin këto ngjarje me njëra-tjetrën.
Pavarësisht kësaj, teoritë online kanë sugjeruar skenarë të ndryshëm – nga ndërhyrje të fuqive të huaja, deri te përpjekje për të fshehur informacione të ndjeshme shtetërore. Autoritetet, nga ana tjetër, kanë bërë thirrje për kujdes ndaj spekulimeve të pabazuara.
NASA ka deklaruar se bashkëpunon me hetimin dhe se deri tani nuk ka asnjë tregues për kërcënim ndaj sigurisë kombëtare.
Hetimet janë ende në fazë të hershme dhe nuk ka konfirmime për ndonjë lidhje konkrete mes rasteve, por interesi publik dhe presioni politik për përgjigje vazhdon të rritet.
(Burimi: NBC News)
