Një ngjarje tronditëse po shqyrtohet në Birmingham Crown Court, ku një 32-vjeçar akuzohet se ka ndjekur një grua deri në shtëpinë e saj dhe e ka pёrdhunuar, duke besuar gabimisht se ajo ishte myslimane.
Sipas prokurorisë, John Ashby e ndoqi viktimën nga qendra e qytetit Walsall pasi udhëtuan me të njëjtin autobus. Ai dyshohet se ka vëzhguar lëvizjet e saj dhe ka kërkuar mënyrën për të hyrë në banesë.
Ngjarja ndodhi në tetor të vitit të kaluar. Gruaja, e cila është e besimit Sikh, ishte kthyer në shtëpi pa e kuptuar se po ndiqej. Sipas dëshmive në gjykatë, i dyshuari hyri me forcë në banesë dhe e sulmoi atë, duke përdorur edhe fyerje me përmbajtje fetare.
Prokuroria e cilëson sulmin si “të nxitur nga urrejtja fetare”, duke theksuar se agresori e kishte shënjestruar viktimën për shkak të bindjes së tij të gabuar për identitetin e saj fetar.
Pas ngjarjes, gruaja arriti të kërkonte ndihmë, ndërsa fqinjët ndërhynë dhe njoftuan autoritetet. I dyshuari u arrestua disa ditë më vonë në zonën e Perry Barr.
Sipas hetimeve, prova ADN-je e lidhin atë me vendin e ngjarjes, ndërsa viktima e ka identifikuar gjatë një parade identifikimi.
I akuzuari mohon të gjitha akuzat, përfshirë sulmin, grabitjen dhe veprat e tjera penale. Çështja kryesore që po shqyrtohet në gjyq lidhet me mungesën e pëlqimit nga ana e viktimës.
Ngjarja ka ngritur shqetësime serioze për sigurinë dhe për rastet e dhunës së motivuar nga urrejtja fetare në Mbretërinë e Bashkuar. Procesi gjyqësor vijon.
(Burimi: Mirror)
