Shtetet e Bashkuara mund të përballen me mungesë serioze të raketave nëse shpërthen një konflikt i ri në vitet e ardhshme, pasi rezervat janë konsumuar ndjeshëm gjatë operacioneve ushtarake kundër Iranit.
Sipas një analize të Qendrёas për Studime Strategjike dhe Ndërkombëtare, gjatë shtatë javëve të fundit të luftës, ushtria amerikane ka përdorur rreth 45% të raketave të saj Precise Strike, të paktën gjysmën e sistemeve mbrojtëse THAAD dhe afërsisht 50% të raketave interceptuese Patriot.
Raporti thekson se këto nivele përdorimi përputhen me vlerësimet e brendshme të Pentagonit dhe krijojnë një rrezik afatshkurtër për aftësinë e SHBA-ve për t’u përballur me një konflikt tjetër, veçanërisht kundër një fuqie të madhe si Kina.
Në total, SHBA-të kanë shpenzuar edhe rreth 30% të raketave Tomahawk, më shumë se 20% të raketave ajër-tokë me rreze të gjatë dhe rreth 20% të raketave SM-3 dhe SM-6. Sipas ekspertëve, do të duhen nga një deri në pesë vjet për të rikthyer këto rezerva në nivelet e mëparshme.
“Shpenzimet e larta për municione kanë krijuar një dritare të re cenueshmërie, veçanërisht në Paqësorin perëndimor,” tha Mark Cancian, një nga autorët e raportit.
Pentagoni ka nënshkruar kontrata për të rritur prodhimin e raketave, por ritmi i furnizimit mbetet i ngadaltë. Edhe me kapacitet të shtuar, zëvendësimi i plotë i këtyre sistemeve kërkon vite.
Nga ana tjetër, zëdhënësi i Pentagonit këmbëngul se ushtria amerikane ka ende kapacitet të mjaftueshëm për të kryer operacione kurdo që të jetë e nevojshme. Edhe presidenti Donald Trump ka deklaruar se SHBA-të kanë mjaftueshëm armë, megjithëse ka kërkuar fonde shtesë për municionet.
Megjithatë, shqetësimet po rriten edhe në politikë. Ligjvënës amerikanë paralajmërojnë se përdorimi intensiv i municioneve, ndërkohë që kundërshtarë si Irani vazhdojnë të prodhojnë në masë dronë dhe raketa, mund të krijojë një disavantazh strategjik në të ardhmen.
Në afat të shkurtër, SHBA-të pritet të kenë ende kapacitet për të vazhduar operacionet kundër Iranit nëse është e nevojshme. Por në një skenar më të gjerë, rikthimi i plotë i fuqisë ushtarake do të kërkojë kohë – dhe kjo po shihet tashmë si një dobësi potenciale në një botë gjithnjë e më të tensionuar.
