Propozimi që Italia të zëvendësojë Iranin në Kupën e Botës 2026 ka shkaktuar reagime të forta në Romë, me autoritetet italiane që e kanë cilësuar idenë si të papranueshme dhe kundër frymës së sportit.
Ministri italian i Ekonomisë, Giancarlo Giorgetti, reagoi ashpër ndaj sugjerimit të bërë nga i dërguari i Donald Trump, Paolo Zampolli, duke e quajtur atë “turpërues”.
“Sot lexova këtë kërkesë dhe më vjen turp,” u shpreh ai, sipas mediave italiane.
Debati nisi pasi Zampolli propozoi që Italia të marrë pjesë në vend të Iranit, edhe pse “azzurrët” nuk arritën të kualifikohen në fushë.
Nga ana tjetër, FIFA nuk ka bёrё një reagim zyrtar publik, por burime të cituara nga ANSA theksojnë se një ndryshim i tillë nuk ka asnjë bazë. Presidenti i FIFA-s, Gianni Infantino, synon të ruajë Iranin mes 48 skuadrave pjesëmarrëse dhe beson se ekipi do të marrë pjesë normalisht.
Edhe ministri italian i Sportit, Andrea Abodi, e hodhi poshtë idenë:
“Italia kualifikohet në fushë, jo me vendime politike,” deklaroi ai.
Në të njëjtën linjë ishte edhe kreu i Komitetit Olimpik Italian, Luciano Buonfiglio, i cili theksoi:
“Do të isha i fyer. Duhet ta meritosh pjesëmarrjen në Kupën e Botës.”
Ndërkohë, Marco Rubio mohoi që SHBA të ketë ndërmarrë hapa për të përjashtuar Iranin nga turneu, duke zbutur spekulimet për një ndërhyrje politike.
Edhe Ambasada iraniane nё Romё reagoi, duke theksuar se futbolli “i përket njerëzve, jo politikës” dhe se përjashtimi i mundshëm i Iranit do të ishte i pajustifikuar.
Kupa e Botës 2026, që do të zhvillohet në SHBA, Kanada dhe Meksikë, do të jetë edicioni i parë me 48 ekipe, duke rritur ndjeshëm konkurrencën — por edhe duke theksuar një rregull të pandryshuar: vendi në Botëror fitohet në fushë, jo në tavolinë.
(Burimi: AA)
