Një studim i ri sugjeron se oktapodë gjigantë, me gjatësi që arrinin deri në 19 metra, mund të kenë dominuar oqeanet rreth 100 milionë vjet më parë, në të njëjtën periudhë kur në Tokë jetonin dinosaurët.
Kërkimi, i kryer nga shkencëtarë të Hokkaido University dhe i publikuar në Science, bazohet në analiza të nofullave fosile të ruajtura në mënyrë të jashtëzakonshme. Këto mbetje tregojnë se disa nga oktapodët e hershëm nuk ishin thjesht krijesa të vogla detare, por grabitqarë të fuqishëm, të pajisur me krahë të fortë dhe nofulla si sqep për të thyer guaska dhe kocka.
Sipas studimit, trupi i tyre arrinte nga 1.5 deri në 4.5 metra, por me tentakulat e shtrira, gjatësia totale shkonte deri në 7–19 metra, duke i bërë potencialisht jovertebrorët më të mëdhenj të njohur ndonjëherë.
Ky zbulim sfidon bindjen e vjetër se grabitqarët kryesorë të oqeaneve të lashta ishin vetëm vertebrorët si peshqit e mëdhenj dhe zvarranikët detarë. Tani duket se edhe krijesa pa shtyllë kurrizore, si oktapodët, mund të kenë qenë në majë të zinxhirit ushqimor.
Një detaj interesant nga fosilet është konsumimi i pabarabartë i nofullave — një shenjë që këto kafshë mund të kenë preferuar njërën anë gjatë ushqyerjes. Ky fenomen lidhet zakonisht me funksione të avancuara të trurit, duke përforcuar idenë se edhe këta oktapodë të lashtë mund të kenë pasur inteligjencë të zhvilluar.
Për krahasim, sot specia më e madhe e gjallë, Giant Pacific Octopus, arrin një hapje krahësh mbi 5.5 metra — shumë më e vogël se gjigantët e së kaluarës.
Sipas paleontologut Christian Klug, këta oktapodë do të kishin qenë grabitqarë të frikshëm:
“Me tentakulat dhe thithëset e tyre, mund të kapnin prenë pa i lënë asnjë mundësi shpëtimi.”
Megjithatë, shumë mistere mbeten ende. Shkencëtarët nuk kanë gjetur ende fosile që tregojnë saktësisht çfarë hanin këto krijesa apo si dukeshin plotësisht. Nick Longrich sugjeron se ata mund të kenë gjuajtur amonitë, por si çdo oktapod modern, ka gjasa të kenë qenë grabitqarë oportunistë.
Për momentin, këto zbulime ofrojnë një pamje magjepsëse të një bote të zhdukur — ku në thellësitë e oqeanit mund të kenë lëvizur krijesa gjigante, inteligjente dhe tepër të rrezikshme.
(Burimi: CNN)
