Një epokë e re e transportit urban duket se po afrohet: “taksitë fluturuese” elektrike kanë realizuar fluturimet e para demonstrative nga Manhattan drejt aeroportit ndërkombëtar John F. Kennedy në New York.
Kompania Joby Aviation kreu këto fluturime testuese me avionët e saj elektrikë me ngritje vertikale (eVTOL), në kuadër të një programi pilot që synon ta kthejë këtë shërbim në një realitet të përditshëm në qytetet e mëdha.
Mjetet ajrore, që duken si dronë gjigantë me bateri, mund të transportojnë deri në pesë persona (përfshirë pilotin). Ato ngrihen vertikalisht si helikopterët dhe më pas kalojnë në fluturim horizontal duke rrotulluar helikat përpara. Sipas kompanisë, ato janë shumë më të qetё se helikopterët dhe nuk prodhojnë emetime gjatë përdorimit.
Qëllimi është ambicioz: lidhja e heliporteve në Manhattan me aeroportin JFK në më pak se 10 minuta – një rrugë që aktualisht mund të zgjasë deri në dy orë me makinë, në varësi të trafikut.
Fluturimet janë pjesë e një programi 10-ditor testimi të mbështetur nga Administrata e Aviacionit Federal, i cili synon të vlerësojë integrimin e këtyre mjeteve në trafikun ajror urban.
Autoriteti Portual i New York-ut dhe New Jersey-t e konsideron këtë teknologji si një hap drejt të ardhmes së transportit. “Këto fluturime na ndihmojnë të kuptojmë se si teknologjia e re mund t’i shërbejë qytetarëve,” u shpreh kryetari i institucionit.
Joby ka zhvilluar testime të ngjashme që nga viti 2023 dhe po bashkëpunon me kompani si Delta Air Lines dhe Uber për të ndërtuar një rrjet të ardhshëm transporti ajror urban.
Në mars, Departamenti Amerikan i Transportit përzgjodhi tetë programe pilot për testimin e eVTOL-ve, duke përfshirë përdorime të ndryshme si transport pasagjerësh, mallrash, emergjenca dhe madje edhe fluturime autonome.
Ndërkohë, në vitin 2024, autoritetet amerikane publikuan rregullat e para që i afrojnë këto mjete më shumë drejt përdorimit komercial. Aktualisht, Joby ndodhet në fazat finale të certifikimit – një proces me pesë etapa që duhet të përfundojë përpara se “taksitë fluturuese” të bëhen pjesë e përditshme e jetës urbane.
Nëse testimet rezultojnë të suksesshme, fluturimet mbi trafikun e dendur të qyteteve mund të mos jenë më një ide futuriste, por një zgjidhje reale për transportin e së ardhmes.
(Burimi: CNN)
