Kryeministri indian Narendra Modi ka bërë thirrje për rikthimin e disa masave të përdorura gjatë pandemisë së COVID-19, mes frikës për pasojat ekonomike dhe energjetike të krizës në Lindjen e Mesme dhe tensioneve në Ngushticën e Hormuzit.
Duke folur në Hyderabad, Modi tha se India duhet të reduktojë varësinë nga importet e energjisë dhe të kursejë valutën e huaj, ndërsa u kërkoi qytetarëve të ndryshojnë mënyrën e jetesës dhe konsumin.
“Gjatë pandemisë punuam nga shtëpia, zhvilluam takime virtuale dhe video-konferenca. U mësuam me këtë. Nevoja e momentit është t’u rikthehemi këtyre metodave”, deklaroi ai.
Kreu i qeverisë indiane sugjeroi rikthimin e punës nga shtëpia aty ku është e mundur, si pjesë e masave për të ulur konsumin e karburanteve dhe kostot ekonomike.
Modi shkoi edhe më tej, duke u kërkuar indianëve të shmangin për një vit udhëtimet jashtë vendit, dasmat luksoze në vende të huaja dhe blerjet e arit.
“Tek shtresa e mesme është përhapur kultura e dasmave dhe pushimeve jashtë vendit. Gjatë kësaj krize duhet të vendosim t’i shtyjmë këto për të paktën një vit”, tha ai.
Ai paralajmëroi gjithashtu për nevojën urgjente të kursimit të karburanteve, duke kujtuar se India importon pjesën më të madhe të naftës dhe gazit.
“Benzina, nafta dhe gazi duhet të përdoren me shumë kursim. Duhet të konsumojmë vetëm atë që është e domosdoshme”, u shpreh Modi.
Kryeministri indian u bëri thirrje qytetarëve të përdorin më shumë transportin publik, metrotë dhe hekurudhat, si dhe të organizojnë udhëtime të përbashkëta me automjete për të ulur konsumin.
Deklaratat e Modit vijnë në një moment kur tensionet mes SHBA-ve, Iranit dhe Izraelit kanë tronditur tregjet globale dhe kanë rritur ndjeshëm çmimet e energjisë, ndërsa bllokimi i Ngushticës së Hormuzit vazhdon të kërcënojë furnizimet botërore me naftë dhe gaz.
