Vjena ka hapur zyrtarisht javën e Eurovision 2026 me ceremoninë tradicionale, duke kthyer qendrën e kryeqytetit austriak në zemrën e muzikës europiane.
Përfaqësuesit e 35 vendeve pjesëmarrëse parakaluan përgjatë një qilimi prej 200 metrash, nga Burgtheater deri në Bashkinë e Vjenës, mes mijëra fansave dhe atmosferës festive që shënon nisjen e eventit më të madh muzikor në Europë.
Ceremonia u çel nga kryebashkiaku i Vjenës, Michael Ludwig, i cili mirëpriti artistët dhe delegacionet, duke nisur simbolikisht numërimin mbrapsht drejt finales së madhe të Eurovisionit.
Parakalimi u shoqërua nga Orkestra Simfonike e Radios ORF të Vjenës, e dirigjuar nga Christian Kolonovits, ndërsa Woodstock Allstar Band interpretoi motive muzikore të frymëzuara nga traditat e secilit shtet pjesëmarrës.
Fituesi i vitit të kaluar, JJ, mbylli ceremoninë me interpretimin e këngës “Wasted Love”, i shoqëruar nga orkestra simfonike.
Italia këtë vit përfaqësohet nga Sal Da Vinci, i cili u shfaq me një kostum klasik të zi dhe tha se ndihej i emocionuar nga atmosfera e Vjenës.
“Më pëlqen shumë Vjena. Është një qytet i mbushur me art, kulturë dhe muzikë”, deklaroi ai për mediat.
Ndër emrat që tërhoqën më shumë vëmendje ishte edhe Boy George, një nga figurat më të njohura të këtij edicioni, i cili konkurron për San Marinon së bashku me këngëtaren italiane Senhit.
Artistja zvicerane Veronica Fusaro foli për origjinën e saj italiane nga Kalabria, ndërsa britaniku ekscentrik Look Mum No Computer parakaloi me kompjuterin e tij elektronik karakteristik.
Në qilimin turkez dominuan veshjet elegante dhe ekstravagante: fustane të artë, të kuq të ndezur dhe stile teatrale që e kthyen ceremoninë në një spektakël mode po aq sa muzike.
Por ceremonia nuk kaloi pa tensione politike.
Rreth 200 protestues iranianë u mblodhën në Vjenë për të protestuar kundër pjesëmarrjes së Izraelit në festival dhe kundër regjimit të Ajatollahëve në Iran. Aktivistët mbanin pankarta me sloganin “Bojkotoni Eurovisionin” dhe valëvitnin flamuj iranianë të periudhës së Shahut.
Ceremonia inauguroi edhe “Eurovision Village”, hapësirën kryesore të tifozëve pranë Stadthalle të Vjenës, ku publiku do të ndjekë gjysmëfinalet dhe finalen në ekrane gjigante, mes koncerteve dhe aktiviteteve festive që do të zgjasin gjatë gjithë javës.
(Burimi: ANSA)
