Procesi penal ndaj Agim Ismailit, Arnold Rrokajt dhe Zambak Gjonit, të akuzuar për hyrjen në sistemet elektronike të SPAK dhe për shpërndarjen e materialeve hetimore sekrete, do të zhvillohet larg syve të publikut dhe mediave.
Gjykata e Posaçme pranoi kërkesën e prokurorit të SPAK, z. Bledar Maksuti, për zhvillimin me dyer të mbyllura të gjykimit, duke përjashtuar jo vetëm gazetarët, por edhe familjarët e të pandehurve nga ndjekja e seancave.
Vendimi vjen në një dosje që konsiderohet ndër më delikatet për vetë Prokurorinë e Posaçme, pasi hetimet lidhen me aksesimin e paligjshëm të tre adresave elektronike të prokurorëve Behar Dibra, Elida Kaçkini dhe Enkeleda Millonai. Sipas akuzës, përmes këtyre adresave janë marrë materiale hetimore të ndjeshme që më pas janë shpërndarë tek persona të tretë.
Në qendër të dosjes qëndron Arnold Rrokaj, i cili gjatë marrjes në pyetje ka pranuar se kishte hyrë në e-mailet e prokurorëve duke përdorur një kod rutinë sigurie. SPAK pretendon se dokumentet e siguruara prej tij janë kaluar më pas tek Zambak Gjoni dhe Agim Ismaili.
Me dyer tashmë të mbyllura, tre të pandehurit do të përballen vetëm me SPAK dhe Gjykatën e Posaçme, në një proces ku akuzat e ngritura rëndojnë ndjeshëm pozitën e tyre penale.
Arnold Rrokaj, që mbahet në burg, akuzohet për “hyrje të paautorizuar kompjuterike”, “përgjim të paligjshëm të të dhënave kompjuterike”, si dhe për kryerjen e veprave në kuadër të grupit të strukturuar kriminal. Për këto akuza, ai rrezikon deri në 20 vite burg.
Të njëjtin maksimum dënimi rrezikojnë edhe Zambak Gjoni dhe ish-drejtori i disa institucioneve të rëndësishme shtetërore, Agim Ismaili, ndaj të cilit SPAK ka ngritur akuza që në minimum parashikojnë mbi 12 vite burgim.
Ismaili, i cili po gjykohet në gjendje të lirë, është figura më e njohur politike dhe administrative në këtë dosje. Ai ka drejtuar më parë Drejtorinë e Burgjeve, AKU-në dhe IKMT-në, tre poste të rëndësishme të besuara nga qeveria Rama.
(Burimi: Syri)
