Këngëtarja me famë botërore Dua Lipa ka ngritur një padi prej të paktën 15 milionë dollarësh kundër gjigantit teknologjik Samsung, duke e akuzuar kompaninë se ka përdorur pa autorizim imazhin e saj në paketimin e televizorëve të shitur në tregun amerikan.
Padia është depozituar në Gjykatën Federale të Kalifornisë dhe lidhet me përdorimin e një fotografie të artistes britanike në kutitë karton të televizorëve Samsung, çka sipas ekipit ligjor të këngëtares krijonte idenë e rreme se ajo ishte sponsore apo partnere zyrtare e markës.
Në dokumentet gjyqësore thuhet se Dua Lipa nuk ka lidhur asnjë marrëveshje me Samsung për përdorimin e emrit, imazhit apo ngjashmërisë së saj dhe se kompania ka përfituar komercialisht duke shfrytëzuar famën e artistes pa pëlqimin e saj.
“Samsung ka përfituar nga lidhja e nënkuptuar dhe e pavërtetë me znj. Lipa për të promovuar televizorët e saj”, thuhet në dosjen e paraqitur në gjykatë.
Avokatët e këngëtares pretendojnë gjithashtu se kompania koreano-jugore ka refuzuar kërkesat e përsëritura për të ndaluar përdorimin e fotografisë së saj në paketimet e produkteve.
Padia përfshin akuza për shkelje të të drejtave të autorit, shkelje të markës tregtare dhe cenim të të drejtës së publicitetit, duke argumentuar se imazhi i Dua Lipës përbën një aset shumë të vlefshëm komercial.
Dua Lipa, e cila nisi karrierën si modele përpara se të shndërrohej në një prej yjeve më të mëdhenj të muzikës pop, ka ndërtuar ndër vite një markë globale përmes bashkëpunimeve me kompani të njohura si Puma, Yves Saint Laurent dhe Versace.
Samsung ka refuzuar të komentojë mbi çështjen.
(Burimi: CNN)
