Një sulm i armatosur në xhaminë më të madhe të San Diegos ka tronditur SHBA-në, pasi tre persona mbetën të vrarë, ndërsa dy autorët e dyshuar – adoleshentë – u gjetën të vdekur pak minuta më vonë brenda një automjeti pranë vendit të ngjarjes. Autoritetet po e hetojnë ngjarjen si krim urrejtjeje me motive anti-islame.
Sulmi ndodhi në Qendrën Islamike të San Diegos, një kompleks që përveç xhamisë përfshin edhe shkollë dhe ambiente komunitare. Mes viktimave ishte edhe një roje sigurie, të cilin policia e cilësoi si hero, pasi ndërhyrja e tij dyshohet se shpëtoi dhjetëra jetë.
Sipas hetimeve paraprake, gjithçka nisi me një telefonatë alarmante të një nëne në orën 09:42 të mëngjesit. Ajo raportoi në polici se djali i saj 17-vjeçar ishte zhdukur bashkë me disa armë dhe makinën e familjes. Autoritetet nisën menjëherë kërkimet për dy të rinjtë, por pak orë më vonë ata do të godisnin objektivin e tyre: xhaminë.
Policia mbërriti në vendngjarje pak para mesditës dhe gjeti tre persona të pajetë pranë hyrjes së xhamisë. Ndërkohë, vetëm pak blloqe më larg u raportuan të shtëna të tjera dhe më pas u zbulua automjeti ku ndodheshin dy autorët e dyshuar, 17 dhe 18 vjeç, të cilët sipas policisë kishin vrarë veten pas sulmit.
Hetuesit zbuluan mesazhe urrejtjeje dhe shkrime anti-islame në armët dhe në automjetin e autorëve. Sipas burimeve të CNN, një prej armëve kishte të shkruar fjalë urrejtjeje, ndërsa në makinë u gjet edhe një letër vetëvrasjeje me referenca për “superioritet racial”.
Policia identifikoi njërin prej autorëve si Cain Clark, 17 vjeç. Familjarët dhe shokët e tij thanë për mediat amerikane se ishin të tronditur dhe e përshkruan si “një djalë të mirë” që përpiqej të përshtatej me të tjerët.
Ngjarja ka shkaktuar reagime të forta në SHBA. Qendra Islamike e San Diegos njoftoi mbylljen e përkohshme të aktivitetit, ndërsa organizatat myslimane dhe autoritetet lokale e cilësuan sulmin si një tragjedi kombëtare.
“Askush nuk duhet të ketë frikë për jetën ndërsa lutet apo çon fëmijët në shkollë”, deklaroi drejtori i Këshillit Amerikano-Islam për Marrëdhëniet në Kaliforni.
(Burimi: CNN, The New York Times)
