Normat e lindshmërisë në SHBA kanë vijuar rënien edhe gjatë vitit 2025, por sipas një analize të publikuar nga “The New York Times”, arsyeja nuk është mister dhe as “karriera e grave” nuk e ka fajin, siç pretendojnë disa zëra konservatorë në Amerikë.
Shkrimtarja dhe analistja Jessica Grose argumenton se rënia e fertilitetit lidhet kryesisht me uljen drastike të shtatzënive tek adoleshentet, ndërsa lindjet te gratë në të 30-at dhe 40-at janë rritur gjatë dy dekadave të fundit.
Debati është ndezur pasi figura konservatore në SHBA kanë fajësuar feminizmin dhe gratë ambicioze për uljen e lindjeve. Katie Miller, bashkëshortja e Stephen Miller dhe podkastere konservatore, deklaroi se “fati biologjik i grave është të bëjnë fëmijë, jo të kalojnë jetën pas tavolinave duke ndjekur karrierën”.
Por analiza thekson se vetë këto figura vazhdojnë të mbajnë pozicione të rëndësishme profesionale, ndërsa statistikat tregojnë se gratë me arsim universitar po bëjnë më shumë fëmijë sesa gratë me nivel më të ulët arsimimi.
Problemi nuk mund të reduktohet vetëm te gratë, pasi edhe roli i burrave ka ndryshuar ndjeshëm. Gjithnjë e më shumë meshkuj po kalojnë më shumë kohë me familjen, po reduktojnë orët e punës dhe po ndajnë barrën e punëve të shtëpisë.
Një analizë e “American Institute for Boys and Men” tregon se pas pandemisë Covid-19, burrat kanë shtuar kohën e kaluar me fëmijët dhe janë përfshirë më shumë në jetën familjare.
Artikulli nënvizon se shumë çifte të reja nuk duan më modele jetese ku një prind sakrifikon gjithçka vetëm për punën apo mbijetesën ekonomike. Në vend të kësaj, ata kërkojnë balancë, kohë për familjen dhe një jetë më të menaxhueshme emocionalisht dhe financiarisht.
Po ashtu, mosha mesatare e baballarëve është rritur ndjeshëm, ndërsa edhe përdorimi i vazektomive po shtohet, çka tregon se vendimet për familjen nuk varen vetëm nga gratë.
Rënia e lindjeve është rezultat i një kombinimi faktorësh: më shumë arsimim, përdorim më i madh i kontraceptivëve, shtyrje e prindërimit dhe fakti që sot të mos kesh fëmijë nuk konsiderohet më tabu sociale.
“Problemi nuk zgjidhet duke fajësuar gratë që kanë ambicie profesionale. Ndoshta duhet të dëgjojmë më shumë se si të rinjtë duan të jetojnë dhe çfarë lloj shoqërie do t’i mbështeste më mirë”, përfundon analiza e Jessica Grose.
(Burimi: Përshtatur nga NYT)
