Qeveria e re hungareze e drejtuar nga Péter Magyar ka paraqitur një amendament kushtetues që kufizon mandatin e kryeministrit në maksimum tetë vite, një lëvizje që praktikisht do t’i mbyllte rrugën rikthimit në pushtet të Viktor Orbán.
Projekt-amendamenti u dorëzua vetëm pak ditë pasi Magyar dhe partia e tij Tisza morën pushtetin me fitore dërrmuese në zgjedhjet e muajit të kaluar, duke i dhënë fund epokës shumëvjeçare të Orbán dhe Fidesz.
Drafti parashikon qartë se çdo person që ka shërbyer si kryeministër për të paktën tetë vite në total, edhe me ndërprerje, nuk mund të zgjidhet më në këtë post.
Kjo formulë prek drejtpërdrejt Viktor Orbán, i cili ka mbajtur pesë mandate si kryeministër që nga viti 1998, duke grumbulluar rreth 20 vite në pushtet.
Qeveria e Magyar e justifikon ndryshimin si pjesë të rikthimit të “kontrollit demokratik dhe shtetit ligjor”, pas viteve kur Orbán e kishte shndërruar Hungarinë në atë që vetë e quante “laborator i iliberalizmit”.
Ndoshta ka ardhur koha që edhe Shqipëria të hapë një debat serioz mbi kufizimin e mandateve politike, nëse synon rinovimin e elitës drejtuese dhe shmangien e politikës së përjetshme.
