Një studim i ri shkencor ka zbuluar se popullsitë indigjene të Andeve në Peru kanë zhvilluar një lloj “superfuqie” gjenetike falë konsumit të patates për mijëra vite. Studiuesit zbuluan se këto komunitete kanë shumë më tepër kopje të një gjeni të quajtur AMY1, i cili ndihmon trupin të tresë ushqimet me niseshte si patatet.
Kërkimi, i publikuar në revistën Nature Communications nga shkencëtarë të UCLA dhe Universitetit të Buffalo-s, tregon se banorët indigjenë të Andeve kanë nga dy deri në katër kopje më shumë të gjenit AMY1 krahasuar me shumicën e popullsive të tjera njerëzore.
Patatja, që sot konsumohet në të gjithë botën, e ka origjinën pikërisht në rajonin e Andeve dhe kultivohet aty prej të paktën 6 mijë deri në 10 mijë vitesh. Ajo ishte një nga burimet kryesore të energjisë për Perandorinë Inka dhe përdorej edhe në formë të tharë e të ngrirë, e njohur si “chuño”.
Shkencëtarët analizuan ADN-në e folësve të gjuhës Keçua dhe e krahasuan me databaza gjenetike globale. Rezultatet treguan se individët me më shumë kopje të AMY1 kishin avantazh më të madh mbijetese dhe riprodhimi në kushte ku dieta mbështetej fort te ushqimet me niseshte.
Sipas studiuesve, njerëzit që jetonin rreth 10 mijë vite më parë dhe kishin 10 kopje të këtij gjeni kishin rreth 1.24% më shumë avantazh në mbijetesë apo riprodhim në çdo brez. Me kalimin e kohës, individët me më pak kopje të AMY1 u zhdukën gradualisht nga popullata, ndërsa ata me më shumë kopje mbijetuan dhe ua transmetuan pasardhësve.
Ekspertët thonë se ky zbulim është një shembull i rrallë se si dieta mund të ndikojë drejtpërdrejt në evolucionin njerëzor dhe në ADN-në tonë. “Trupi ynë vazhdon të përshtatet me ushqimet që na mbajnë gjallë”, theksojnë autorët e studimit.
(Burimi: Popular Mechanics)
