Shkencëtarët në Gjermani kanë ngritur alarmin për një formë të re survejimi që mund të ndryshojë totalisht privatësinë në epokën digjitale: identifikimin e njerëzve përmes valёve të zakonshme WiFi. Sipas studiuesve, routerët standardë mund të njohin dhe gjurmojnë individët me pothuajse 100% saktësi, edhe kur ata nuk mbajnë telefon me vete ose e kanë të fikur.
Eksperimenti u zhvillua nga studiues të Institutit të Teknologjisë Karlsruhe (KIT), të cilët përdorën inteligjencën artificiale për të analizuar mënyrën se si valët radio reflektohen nga trupi i njeriut. Sipas profesor Thorsten Strufe, sistemi funksionon si një “kamerë e padukshme”, por në vend të dritës përdor sinjalet WiFi.
“Ne mund të krijojmë një lloj imazhi të ambientit dhe të personave që ndodhen aty vetëm duke analizuar përhapjen e valëve radio”, shpjegon ai. Studiuesit theksojnë se nuk ka rëndësi nëse personi ka një pajisje WiFi me vete apo jo, pasi rrjeti vazhdon të prodhojë mjaftueshëm sinjal për identifikim.
Sipas ekipit kërkimor, teknologjia mund t’i kthejë routerët e zakonshëm në sisteme survejimi të fshehtë. “Nëse kaloni çdo ditë pranë një kafeneje me WiFi, mund të identifikoheni pa e kuptuar dhe të njiheni më vonë nga kompani apo autoritete”, paralajmëron studiuesi Julian Todt.
Ndryshe nga sistemet e mëparshme eksperimentale, kjo metodë nuk kërkon pajisje speciale apo sensorë të kushtueshëm. Ajo përdor informacionin normal që shkëmbehet mes routerit dhe pajisjeve të lidhura në rrjet, të njohur si “beamforming feedback information” (BFI), i cili transmetohet pa enkriptim dhe mund të lexohet nga kushdo brenda rrezes së sinjalit.
Në testet e realizuara me 197 persona, sistemi arriti të identifikonte individët me pothuajse 100% saktësi, pavarësisht këndit të lëvizjes apo mënyrës së ecjes. Studiuesit paralajmërojnë se teknologjia mund të përdoret në mënyrë abuzive, veçanërisht nga regjime autoritare për monitorimin e qytetarëve dhe protestuesve.
Ekspertët kërkojnë tashmë që standardet e reja të WiFi-sё të përfshijnë masa më të forta mbrojtjeje për privatësinë, përpara se kjo teknologji të përhapet gjerësisht.
(Burimi: Përshtatur nga ScienceDaily)
