Gisèle Pelicot, gruaja franceze që tronditi botën pasi hoqi dorë nga anonimati gjatë gjyqit ndaj ish-bashkëshortit të saj Dominique Pelicot, ka treguar se ka arritur të gjejë sërish dashurinë dhe besimin te njerëzit pas viteve të abuzimit seksual.
73-vjeçarja foli në Festivalin Hay në Uells, ku rrëfeu për herë të parë momentin kur u dashurua sërish me partnerin e saj aktual, Jean-Loup Agopian.
“Nuk mendoja kurrë se do të mund t’i besoja më një burri. Sidomos në këtë moshë, nuk doja as të dashurohesha më, por jeta vendosi ndryshe”, tha ajo.
Dominique Pelicot u dënua në vitin 2024 me 20 vite burg pasi për afro një dekadë e drogoi fshehurazi bashkëshorten dhe lejoi qindra burra ta përdhunonin ndërsa ajo ishte pa ndjenja.
Gjatë fjalës së saj, Gisèle Pelicot tha se historia e saj nuk është një rast i izoluar, por simbol i një problemi shumë më të madh të dhunës ndaj grave.
“Shoqëria duhet të zgjohet. Është një e keqe e tmerrshme që prek çdo kufi”, deklaroi ajo.
Pelicot tregoi se për vite me radhë nuk e kuptonte çfarë po ndodhte me trupin dhe kujtesën e saj, ndërsa familjarët mendonin se ajo ishte e sëmurë apo nën efektin e alkoolit.
“Ai më drogoi aq rëndë sa sot pyes veten si zemra dhe trupi im arritën të mbijetonin”, tha ajo.
Ajo kujtoi gjithashtu momentin kur vendosi të hiqte dorë nga e drejta për anonimat gjatë procesit gjyqësor, edhe pse e dinte se do të përballej me sulme dhe poshtërime publike.
“E kuptova se do të më bënin të paguaja shumë shtrenjtë këtë vendim dhe pikërisht kjo ndodhi. U përpoqën të më poshtëronin”, u shpreh Pelicot.
Në skenë ajo foli edhe për vajzën e saj, Caroline Darian, e cila po ndjek një çështje të veçantë ligjore ndaj të atit. Në kompjuterin e Dominique Pelicot u gjetën fotografi të vajzës së tij të pavetëdijshme në shtrat, çka ka ngritur dyshime për sjellje incestuese.
“Jam shumë krenare për vajzën time”, tha Pelicot, ndërsa e ftoi në skenë mes duartrokitjeve.
Gisèle Pelicot u kthye në një simbol ndërkombëtar të luftës kundër dhunës seksuale pas procesit që tronditi Francën dhe opinionin publik botëror.
(Burimi: The Guardian)
