Botërori FIFA 2026 nis këtë të enjte, duke shënuar fillimin e turneut më të madh që është zhvilluar ndonjëherë në historinë e futbollit. Për herë të parë, Kupa e Botës organizohet nga tre vende njëherësh – Shtetet e Bashkuara, Meksika dhe Kanadaja – dhe për herë të parë do të marrin pjesë 48 kombëtare.
Ndeshja hapëse do të luhet sot në stadiumin e Ciudad de Mexico mes Meksikës dhe Afrikës së Jugut, ndërsa finalja do të zhvillohet më 19 korrik në stadiumin MetLife në East Rutherford, pranë Nju Jorkut.
Gjatë gjashtë javëve do të zhvillohen plot 104 ndeshje në 16 stadiume të shpërndara në katër zona të ndryshme kohore. Shtetet e Bashkuara do të presin pjesën më të madhe të turneut, me 78 ndeshje.
Një total prej 1.248 futbollistësh nga 48 vende do të zbresin në fushë. Nga këta, 357 kanë marrë pjesë më parë në një Botëror, ndërsa 891 do ta përjetojnë për herë të parë këtë kompeticion.
Turneu do të sjellë edhe disa rekorde historike. Për herë të parë, Afrika do të përfaqësohet me 10 kombëtare: Senegali, Maroku, Egjipti, Gana, Algjeria, Tunizia, Bregu i Fildishtë, Kepi i Gjelbër, Afrika e Jugut dhe Republika Demokratike e Kongos.
Po ashtu, për herë të parë në histori do të marrin pjesë tetë vende arabe: Algjeria, Egjipti, Iraku, Jordania, Maroku, Katari, Arabia Saudite dhe Tunizia.
Katër kombëtare do të debutojnë në Kupën e Botës: Kepi i Gjelbër, Kurasao, Jordania dhe Uzbekistani.
Pjesëmarrja e Iranit vazhdon të jetë një nga temat më të diskutuara të këtij Botërori për shkak të tensioneve me Shtetet e Bashkuara. FIFA ka refuzuar kërkesën e federatës iraniane për t’i zhvilluar ndeshjet e grupit në Meksikë ose Kanada, duke konfirmuar se ato do të luhen sipas kalendarit në qytetet amerikane.
Ndërkohë, vendi organizator, SHBA-ja, do të përballet në Grupin D me Turqinë, Paraguain dhe Australinë.
Një nga elementët më të veçantë të këtij Botërori është stadiumi i Ciudad de Mexico, i cili do të hyjë në histori si stadiumi i parë që pret tri herë ndeshjen hapëse të Kupës së Botës. Arena legjendare kishte pritur më parë ceremonitë dhe ndeshjet hapëse të Botërorëve 1970 dhe 1986, duke qenë gjithashtu stadiumi ku Pelé ngriti trofeun e Kupës së Botës në vitin 1970 dhe ku Diego Maradona realizoi golin e famshëm të shekullit në vitin 1986.
Megjithatë, jo gjithçka është festive për tifozët. Çmimet e larta të biletave, kostot e akomodimit dhe udhëtimet e gjata mes tre vendeve organizatore kanë krijuar sfida të mëdha për ndjekësit e futbollit. Shumë tifozë do të duhet të përshkojnë mijëra kilometra për të ndjekur skuadrat e tyre gjatë turneut.
Me më shumë skuadra, më shumë ndeshje dhe një organizim të paprecedentë në tre shtete, Botërori 2026 pritet të jetë edicioni më spektakolar dhe më i diskutuar në historinë e Kupës së Botës.
