Vetëm pak ditë para zhvillimit të Ministerialit Ukrainë – Evropa Juglindore në Tiranë, Ministria për Evropën dhe Punët e Jashtme njoftoi shtyrjen e aktivitetit për një datë të pacaktuar.
Shpjegimi zyrtar flet për situatën e sigurisë në Ukrainë dhe angazhimet e ministrit të Jashtëm ukrainas Andrii Sybiha, i cili ishte bashkëorganizator i takimit.
Njoftimi është formal, i shkurtër dhe pa shumë detaje.
Megjithatë, momenti kur vjen ky vendim ёshtё i diskutueshёm.
Ministeriali ishte planifikuar të zhvillohej më 12 qershor në Tiranë, në një periudhë kur protestat po vijojnё tё mbushin pёrplot sheshin dhe kur klima politike në vend mbetet e tensionuar.
Në kushte normale, një takim i tillë do të ishte një mundësi për qeverinë shqiptare për të shfaqur rolin e saj diplomatik në rajon dhe mbështetjen për Ukrainën. Pikërisht për këtë arsye, shtyrja e papritur ka tërhequr vëmendje.
Zyrtarisht, arsyeja lidhet me zhvillimet në Ukrainë.
Por në Tiranë mbetet e vështirë të mos vihet re përkimi mes datës së aktivitetit dhe tensionit të ditëve të fundit.
Qeveria nuk ka dhënë asnjë sqarim tjetër përtej njoftimit formal dhe nuk ka bërë të ditur nëse data e re është diskutuar më herët me palën ukrainase apo nëse vendimi është marrë në momentet e fundit.
Ndërkohë, shtyrja e një aktiviteti të këtij niveli lë bosh një nga ngjarjet më të rëndësishme diplomatike që priteshin të zhvilloheshin këtë muaj në Shqipëri.
Nëse bëhet fjalë vetëm për zhvillimet e luftës në Ukrainë, data e re do ta konfirmojë shpejt këtë.
Nëse pas vendimit fshihet edhe shqetësimi për protestat në Tiranë, kjo mbetet diçka që qeveria nuk e pranon dhe nuk e komenton.
Por fakti që një ministerial ndërkombëtar shtyhet pikërisht në këtë moment do të vazhdojë të ushqejë dyshimet dhe interpretimet politike.
Njoftimi i plotë i Ministrisë për Evropën dhe Punët e Jashtme:
NJOFTIM PËR SHTYRJEN E MINISTERIALIT UKRAINË – EVROPA JUGLINDORE
Ministria për Evropën dhe Punët e Jashtme informon se Ministeriali Ukrainë – Evropa Juglindore, i planifikuar që të zhvillohej më 12 qershor 2026 në Tiranë, do të mbahet në një datë të mëvonshme.
Shtyrja e këtij takimi në nivel të ministrave të punëve të jashtme vjen si pasojë e situatës së sigurisë në Ukrainë dhe e angazhimeve në këtë kuadër, të Ministrit të Punëve të Jashtme të Ukrainës, Sh.T. z. Andrii Sybiha, bashkëorganizator i Ministerialit të Tiranës.
Data e re e zhvillimit të Ministerialit do të bëhet e ditur në një moment të dytë.
