Protokollet më të forta të verifikimit janë rikthyer pasi mashtruesit e dyshuar përfituan nga programi gjatë administratës Biden
Si pjesë e një fushate mbarëqeveritare kundër mashtrimit, Departamenti Amerikan i Shëndetësisë dhe Shërbimeve Njerëzore (HHS) i administratës Trump ka zbuluar miliona persona të dyshuar për regjistrime mashtruese në programin Affordable Care Act (ACA), i njohur gjerësisht si Obamacare, sipas një raporti të siguruar nga Fox News Digital.
Rritja e ndjeshme e regjistrimeve në Obamacare gjatë administratës Biden çoi në hapjen e një hetimi për të verifikuar vërtetësinë e miliona kërkesave, konfirmoi një zyrtar i administratës Trump. Në fillim të mandatit të presidentit Biden, rreth 10 milionë persona ishin të regjistruar në programin federal të sigurimit shëndetësor. Megjithatë, deri në kulmin e vitit 2024, ky numër ishte rritur në mënyrë dramatike, duke arritur në 22 milionë.
Sipas administratës Trump, deri tani janë hequr nga skema afro tre milionë regjistrime të konsideruara mashtruese, ndërsa planifikohet eliminimi edhe i rreth 2.6 milionë regjistrimeve të tjera.
Zyrtari i administratës deklaroi se abuzimi masiv me këtë program i ka kushtuar taksapaguesve amerikanë rreth 10 miliardë dollarë në vit, gjatë periudhës 2021–2024.
Sipas raportit, administrata Biden kishte lehtësuar kontrollet mbi kriteret e pranueshmërisë dhe verifikimin e të ardhurave, ndërsa kishte zgjeruar edhe mundësitë për regjistrim gjatë gjithë vitit. Raporti pretendon gjithashtu se shumë mashtrues deklaruan qëllimisht të ardhura të pasakta për të përfituar të drejtën e regjistrimit, ndërsa disa ndërmjetës sigurimesh regjistruan persona në Obamacare pa dijeninë e tyre, një praktikë e njohur si “regjistrime fantazmë”. Për më tepër, disa individë përfituan subvencione për të cilat nuk plotësonin kushtet ligjore.
“Sipas vlerësimeve tona, regjistrimet e parregullta, fantazmë dhe mashtruese arritën kulmin me 5.6 milionë persona në vitin 2025,” thuhet në raport. “Ne vlerësojmë se ende mbeten 2.6 milionë regjistrime të parregullta dhe fantazmë, përfshirë mbi 1 milion regjistrime pa numër të sigurimeve shoqërore.”
Administrata Trump ka rikthyer tashmë verifikimin e të ardhurave, ka shfuqizuar disa mundësi të veçanta regjistrimi, ka kontrolluar rastet e regjistrimeve të dyfishta në programin Medicaid, ka hetuar të ashtuquajturat “regjistrime fantazmë” të kryera nga ndërmjetës mashtrues dhe ka eliminuar disa periudha të posaçme regjistrimi.
Aktualisht, rreth 19.2 milionë persona mbeten të regjistruar në Obamacare.
“Ruajtja e integritetit fiskal dhe administrativ të tregjeve të ACA-së është thelbësore për mbrojtjen e fondeve publike të financuara nga taksapaguesit dhe për t’u siguruar që ato u shërbejnë vetëm atyre që kanë realisht nevojë,” thuhet në raport. “Qeveria federale nuk duhet të paguajë ndërmjetës për të regjistruar individë pa dijeninë e tyre.”
