Pamjet e protestës dhe pёrleshjeve të sotme përreth Kuvendit nuk do të mbahen mend vetëm për përplasjet me policinë apo për vezët e hedhura ndaj deputetëve. Ato mund të shënojnë fillimin e një ndryshimi shumë më të madh: fundin e frikës së qytetarëve dhe fillimin e shqetësimit të klasës politike.
Për vite me radhë, pushteti në Shqipëri është sjellë si i paprekshëm. Deputetë, ministra e zyrtarë kanë hyrë e kanë dalë nga institucionet me bindjen se askush nuk do t’u kërkojë llogari, ndërsa qytetarët do të vazhdojnë të durojnë në heshtje. Mes makinave luksoze, eskortave dhe një arrogance që shpesh ka sfiduar edhe logjikën, u krijua ideja se hendeku mes politikës dhe popullit ishte bërë i pakalueshëm.
Sot u duk se ky hendek nuk është më aq i sigurt.
Ndoshta protesta nuk do të vazhdojë nesër. Ndoshta nuk do të sjellë ndryshime të menjëhershme politike. Por ajo ka lënë një mesazh që nuk fshihet lehtë: qytetarët nuk janë më të gatshëm të pranojnë gjithçka pa reaguar.
Në mesin e protestuesve u panë shumë të rinj, pjesë e brezit Gen Z, një brez që nuk mban mbi supe frikën e tranzicionit dhe nuk ndihet i detyruar t’i nënshtrohet autoritetit vetëm sepse ai mban pushtetin. Ky brez nuk kërkon privilegje; kërkon përgjegjësi.
Megjithatë, zemërimi duhet të mbetet qytetar. Historia ka treguar se kur protesta humbet kontrollin dhe turma udhëhiqet vetëm nga revolta, përfiton gjithmonë pushteti. Dhuna nuk është zgjidhje dhe nuk duhet të bëhet qëllim në vetvete.
Por një gjë duhet të ndryshojë përgjithmonë: politikanët nuk duhet të ndihen më të paprekshëm. Ata duhet ta dinë se çdo dalje publike, çdo vendim dhe çdo akt arrogance mund të përballet me reagimin e qytetarëve.
Në fund të fundit, demokracia nuk funksionon kur populli ka frikë nga pushteti. Demokracia funksionon vetëm kur pushteti ka frikë nga gjykimi i popullit.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
