Gjykata më e lartë e Bashkimit Evropian ka rrëzuar ankesën e Google kundër një gjobe rekord të vendosur për shkelje të rregullave të konkurrencës. Gjiganti i teknologjisë kishte argumentuar se BE-ja po ndëshkonte padrejtësisht inovacionin.
Google do të duhet të paguajë një gjobë rekord prej 4.125 miliardë eurosh (4.67 miliardë dollarë) për praktika antikonkurruese, pasi gjykata më e lartë e Bashkimit Evropian vendosi të enjten kundër ankimit të paraqitur nga kompania.
Komisioni Evropian vendosi fillimisht një gjobë prej 4.3 miliardë eurosh në vitin 2018, duke akuzuar Google se kishte abuzuar me pozitën dominuese të sistemit operativ Android në treg, duke detyruar prodhuesit e telefonave celularë të instalonin paraprakisht Google Search dhe shfletuesin Chrome.
Ekzekutivi i BE-së akuzoi gjigantin e motorëve të kërkimit se kishte kufizuar konkurrencën, duke i shqiptuar njëkohësisht gjobën më të lartë ndonjëherë për shkelje të rregullave të konkurrencës në historinë e bllokut.
Në vitin 2022, Gjykata e Përgjithshme e Bashkimit Evropian konfirmoi gjetjet e Komisionit, por e uli gjobën nga 4.34 miliardë euro në 4.125 miliardë euro. Më pas, Google e apeloi vendimin në Gjykatën e Drejtësisë së Bashkimit Evropian, me seli në Luksemburg, e cila është instanca më e lartë gjyqësore e BE-së. Kjo e fundit tashmë është rreshtuar në krah të autoritetit evropian të konkurrencës.
“Ankimi i paraqitur nga Google dhe kompania mëmë e saj, Alphabet, kundër vendimit të Gjykatës së Përgjithshme rrëzohet, duke konfirmuar kështu gjobën e vendosur për abuzimin e Google Search me pozitën dominuese në kuadër të sistemit operativ Android”, deklaruan gjyqtarët.
Google: BE-ja mbyll sytë ndaj praktikave të Apple
Google pretendoi se çështja ishte e pabazuar, duke argumentuar se sanksioni ndëshkonte inovacionin dhe se përdoruesit e Android ishin të lirë të shkarkonin aplikacione konkurruese.
“Në çdo rast, ne i përshtatëm marrëveshjet tona për të qenë në përputhje me vendimin fillestar që në vitin 2018 dhe mbetemi të përqendruar në vazhdimin e inovacionit dhe ruajtjen e një ekosistemi të hapur për përdoruesit, partnerët dhe zhvilluesit tanë”, thuhet në deklaratën e Google.
Më herët, kompania kishte akuzuar gjithashtu Bashkimin Evropian se po mbyllte sytë ndaj praktikave të Apple, e cila, sipas saj, favorizon shërbimet e veta në telefonat iPhone.
Google është gjobitur me mbi 8 miliardë euro
Ky është vetëm një nga disa konfliktet ligjore për konkurrencën mes Google dhe Bashkimit Evropian. Midis viteve 2017 dhe 2019, BE-ja i ka vendosur kompanisë gjoba që në total tejkalojnë 8 miliardë euro, për shkelje të rregullave të konkurrencës.
Bashkimi Evropian po zhvillon gjithashtu hetime të tjera ndaj gjigantëve të teknologjisë në kuadër të Aktit për Tregjet Digjitale (Digital Markets Act – DMA). Vendimi i së enjtes pritet të forcojë më tej ofensivën rregullatore të bllokut ndaj kompanive të mëdha të teknologjisë.
Ndër sanksionet e tjera që Google po përballet për shfrytëzimin e pozitës së saj dominuese në treg përfshihen:
- Një gjobë prej 2.95 miliardë eurosh, e vendosur në shtator 2025, për favorizimin e shërbimeve të veta të reklamimit.
- Një gjobë prej 2.4 miliardë eurosh, për shkelje të rregullave të konkurrencës, lidhur me promovimin preferencial të shërbimit të vet të krahasimit të çmimeve dhe blerjeve online.
Vitin e kaluar, Presidenti i Shteteve të Bashkuara, Donald Trump, akuzoi Brukselin se po vinte në shënjestër në mënyrë të padrejtë kompanitë amerikane dhe kërcënoi Bashkimin Evropian me vendosjen e tarifave hakmarrëse.
Burimi: DW
