Tetë vite pas shembjes tragjike të urës Morandi në Genova, një gjykatë italiane ka shpallur fajtorë 32 persona për katastrofën që tronditi vendin dhe i mori jetën 43 njerëzve.
Dënimin më të rëndë e mori Giovanni Castellucci, ish-drejtori ekzekutiv i kompanisë Autostrade per l’Italia, i cili u dënua me 12 vite burg për vrasje nga pakujdesia dhe neglizhencë në mirëmbajtjen e urës. Ai po vuan edhe një dënim tjetër për një aksident të ndodhur në vitin 2013, ku një autobus ra, duke shkaktuar vdekjen e 40 personave.
Mes të dënuarve janë edhe drejtues dhe inxhinierë të kompanisë SPEA, përgjegjëse për monitorimin teknik të urës, si dhe ish-zyrtarë të Ministrisë italiane të Infrastrukturës dhe Transportit.
Më 14 gusht 2018, gjatë një stuhie shiu, një segment rreth 200 metra i urës Morandi u shemb papritur nga një lartësi prej rreth 45 metrash. Në momentin e tragjedisë mbi urë po qarkullonin rreth 30 automjete. Bilanci ishte i rëndë: 43 viktima dhe 16 të plagosur.
E ndërtuar në vitin 1967 nga inxhinieri i njohur Riccardo Morandi, ura konsiderohej një vepër inxhinierike e rëndësishme dhe një nyje kryesore që lidhte Italinë veriore me bregdetin dhe Francën.
Hetimet zbuluan se kabllot mbajtëse të njërёs prej shtyllave kryesore ishin dëmtuar rëndë nga korrozioni i çelikut dhe betonit. Sipas prokurorëve, problemet strukturore njiheshin prej vitesh, por punimet e domosdoshme të përforcimit u shtynë vazhdimisht.
Gjatë procesit gjyqësor, prokuroria e cilësoi urën si një “bombë me sahat”, ndërsa avokatët e familjeve të viktimave thanë se alarmet për gjendjen e saj ishin ngritur që në fillim të viteve ’90, por nuk u morën seriozisht.
Në vend të urës Morandi u ndërtua një urë e re, e cila u inaugurua në vitin 2020 dhe shoqërohet me një memorial në kujtim të 43 viktimave të tragjedisë.
