Greqia po intensifikon përpjekjet që Mali i Olimpit, vendi legjendar ku sipas mitologjisë greke banonin Zeusi dhe perënditë e tjera të lashtësisë, të përfshihet në listën e Trashëgimisë Botërore të UNESCO-s.
Komiteti i Trashëgimisë Botërore pritet të shqyrtojë kandidaturën gjatë sesionit të tij të 48-të, që po zhvillohet në Busan të Koresë së Jugut. Athina e ka paraqitur për herë të parë këtë kërkesë në vitin 2014, duke argumentuar se Olimpi ka një vlerë të jashtëzakonshme si nga pikëpamja historike dhe kulturore, ashtu edhe nga ajo natyrore.
Me një lartësi prej 2.918 metrash, Mali i Olimpit është maja më e lartë e Greqisë dhe një nga simbolet më të njohura të qytetërimit antik. Homeri e përshkruante atë si “selinë e të pavdekshmëve”, ndërsa në mitologjinë greke aty ndodhej froni i Zeusit.
Zona gëzon tashmë një status të veçantë mbrojtjeje. Ajo u shpall pylli i parë kombëtar i Greqisë në vitin 1938, u njoh nga UNESCO si Rezervë Biosfere në vitin 1981 dhe në vitin 2021 u shpall Park Kombëtar.
Autoritetet greke besojnë se përfshirja në listën e Trashëgimisë Botërore do të siguronte mbrojtje edhe më të madhe për një zonë që përballet me rritjen e turizmit dhe me pasojat e ndryshimeve klimatike.
“Ky nuk është vetëm një vend me rëndësi për Greqinë. Olimpi është një pasuri për mbarë njerëzimin dhe duhet të mbrohet si i tillë”, tha kryebashkiaku i zonës Dion-Olimp, Evangelos Geroliolios.
Vitin e kaluar mali u vizitua nga rreth 500 mijë turistë, ndërsa autoritetet presin që ky numër të rritet edhe më tej pas suksesit të filmit “The Odyssey” të Christopher Nolan, i cili u xhirua pjesërisht në Greqi dhe ka rikthyer interesin global për mitologjinë greke.
Sipas drejtuesve të Parkut Kombëtar të Olimpit, rreziku më i madh për zonën mbeten zjarret pyjore, të cilat janë bërë më të shpeshta për shkak të temperaturave ekstreme dhe ndryshimeve klimatike. Statusi i UNESCO-s do t’i mundësonte Greqisë të përfitonte mbështetje teknike dhe financiare për forcimin e masave mbrojtëse, përmirësimin e shtigjeve, ndërtimin e strehimeve dhe rritjen e kapaciteteve për parandalimin e zjarreve.
Megjithatë, rezultati mbetet i pasigurt. Organet këshillimore të UNESCO-s thuhet se kanë kërkuar informacion shtesë nga autoritetet greke, çka mund të shtyjë edhe një herë vendimin përfundimtar.
Për autoritetet vendase, megjithatë, koha nuk pret. “Edhe nëse nuk e marrim këtë status tani, duhet të veprojmë menjëherë. Mali i Olimpit ka arritur kufirin e kapacitetit të tij dhe mbrojtja e tij nuk mund të shtyhet më”, theksojnë ata.
Burimi: The Guardian
