Në një mbrëmje të paharruar në Jedah të Arabisë Saudite, boksieri mirditor i peshave të rënda Kristian Prenga për 3 minuta preku lavdinë “e përbotshme” në sportin e boksit, kur rrëzoi kampionin anglez Anthony Joshua, në roundin e parë.
Në një ndeshje të organizuar nën kujdesin e Princit të Kurorës dhe udhëheqësit aktual të Arabisë Saudite, Muhamed bin Selman Al Saud, Prenga u ndesh me Joshuan për një sfidë që do e çonte më tej në luftën për titullin botëror.
Kristian Prenga ishte zgjedhur me kujdes ndër dhjetëra boksierë të botës nga promotorët e Anthony Joshua, pasi ishte një boksier me karrierë dhe fizik të shkëlqyer.
Prenga, në moshën 35-vjeçare, kishte një rekord sportiv prej 21 ndeshjesh me 20 fitore, ndërsa 36-vjeçari Anthony Joshua vinte në mbrëmjen arabe me një rekord prej 33 fitoresh dhe 4 humbjesh, ku 27 prej tyre me knockout. Joshua ka qenë edhe kampion bote i padiskutueshëm, duke bashkuar rripat (IBO) në vitet 2017-2021.
Asnjë nënvlerësim nga Joshua për Prengën në këtë ndeshje. Megjithëse vinte nga një traumë 7 muaj më parë, ku pësoi një aksident me makinë në Afrikë, ku i vdiq edhe shoku i ngushtë, Joshua ishte përgatitur nga vetë kampioni Oleksander Usyk, i cili tashmë që është tërhequr përkohësisht nga boksi ka vënë në dispozicion të Joshuas gjithë stafin e tij të trajnimit dhe veten si mik dhe mentor personal i tij.
Ndeshja u prezantua në të gjithë botën nga DAZN, në një atmosferë ku flamuri kuqezi dhe versioni modern zanor i filmit “Skënderbeu” shoqëroi Kristian Prengën në hyrjen për në ring.
Në roundin e parë, sapo kaluan 20 sekonda, një “uppercut” i shpejtë, ardhur nga një clinch mes dy boksierëve, e rrëzoi gjigandin Joshua përtokë. Një “shock” i vërtetë për të gjithë të pranishmit, komentatorët dhe botën sportive. Joshua nuk po e merrte veten dhe një knockdown i dytë e hodhi për tokë, një minutë më vonë. Një tentativë për një të tretë duket se u ndërpre herët nga gjyqtari. Roundi 1 u mbyll me një buzëqeshje të tronditur nga Joshua, i cili në këndin e tij u këshillua nga trajnerët për diçka që u reflektua menjëherë në roundin 2.
Me fillimin e këtij roundi, Joshua u përpoq të rimerrte qendrën e ringut dhe godiste drejt me grushtin e djathtë.
Prenga u përpoq të mbrohej, duke parë me vështrim pyetës nga trajnerët e tij: “Ç’të bëj?”. Në hyrjen në minutën e tretë mbrojtja e Prengës u shpërthye dhe 3 grushte të drejta shkaktuan një knockout të rrezikshëm. Prenga ra duke dalë me kokën jashtë litarëve.
Ndeshja përfundoi, pa ndonjë pasojë të dukshme për kampionin shqiptar.
Përqafimi i respektit dhe vlerësimit nuk mungoi nga Joshua për mirditorin sfidant në përfundim të ceremonisë së shpalljes fitues të ndeshjes.
Joshua takoi nënën e Prengës, që u fut në ring për të përgëzuar rivalin e djalit të saj, ndërsa stafi shqiptar me plisa në kokë u përshëndet me përzemërsi nga Anthony Joshua.
Me këtë ëndërr të bukur me kampionë boksi, mbrëmja u mbyll për Kristian Prengën dhe mijëra tifozë shqiptarë që e ndoqën ndeshjen me pagesë nga DAZN, sepse institucionet apo televizionet shqiptare nuk menduan ta pasqyronin direkt atë.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
