Europa po përgatitet të përballet këtë javë me valën e katërt të të nxehtit që prej muajit maj, ndërsa temperaturat pritet të arrijnë deri në 40 gradë Celsius në disa vende, duke përkeqësuar edhe më tej situatën dramatike të zjarreve që kanë përfshirë kontinentin.
Sipas parashikimeve, vala e re e të nxehtit do të nisë të hënën dhe do të arrijë kulmin në mesin e javës. Temperaturat më të larta priten në Francë, Spanjë dhe Portugali, por moti ekstrem do të prekë edhe Britaninë e Madhe, ku termometri mund të shënojë deri në 35 gradë Celsius.
Prej muajsh, Europa po përballet me temperatura shumë mbi normalen dhe mungesë reshjesh, duke tharë vegjetacionin dhe krijuar kushtet ideale për përhapjen e zjarreve. Si pasojë, qindra mijëra persona janë detyruar të evakuohen ose të qëndrojnë të izoluar në banesat e tyre, ndërsa mijëra zjarrfikës vazhdojnë betejën me flakët në Francë, Spanjë dhe Itali.
Sistemi Evropian i Informacionit për Zjarret në Pyje paralajmëron se pjesë të Francës jugperëndimore dhe Spanjës veriore do të mbeten në nivelin më të lartë të rrezikut nga zjarret edhe gjatë ditëve në vijim. Rrezik shumë i lartë është shpallur gjithashtu për pjesë të Portugalisë, Ballkanit Perëndimor, Evropës Qendrore, Finlandës veriore dhe disa zona të Turqisë.
Meteorologët francezë paralajmërojnë se, megjithëse stuhitë e fundit kanë sjellë një lehtësim të përkohshëm, erërat e thata dhe temperaturat e larta do ta rrisin sërish rrezikun e zjarreve. Ndërkohë, në Spanjë temperaturat në jug të vendit pritet të kalojnë 40 gradë Celsius, ndërsa Portugalia ka shpallur nivelin maksimal të alarmit për rrezikun e zjarreve në disa rajone.
Ekspertët kujtojnë se Evropa është kontinenti që po ngrohet më shpejt në botë. Vitet e fundit, valët e të nxehtit janë bërë më të shpeshta, më intensive dhe më jetëgjata, ndërsa mijëra njerëz humbin jetën çdo vit nga pasojat e temperaturave ekstreme.
Një problem shtesë është se shumë qytete evropiane nuk janë ndërtuar për t’i përballuar temperatura kaq të larta. Shumë banesa, shkolla dhe ambiente pune nuk kanë sisteme ftohjeje, ndërsa në disa vende përdorimi i kondicionerëve mbetet i kufizuar për shkak të kostove të larta të energjisë ose debateve mjedisore.
Mjekët u bëjnë thirrje qytetarëve të shmangin ekspozimin në diell gjatë orëve më të nxehta, të konsumojnë sa më shumë ujë, të qëndrojnë në ambiente të freskëta dhe të kërkojnë ndihmë mjekësore në rast të simptomave si marramendje, të përziera, puls i shpejtë apo humbje e vetëdijes.
