Kuvendi i Shqipërisë do të mblidhet nesër për të zhvilluar një seancë plenare.
Niko Peleshi ka njoftuar se seanca do të zhvillohet në orën 10:00.
Po të shohësh rendin e ditës së kësaj seance, habitesh me çfarë është parashikuar të bëhet. Do të miratohet një procesverbal i seancës së kaluar, si procedurë normale që zhvillohet në çdo seancë për atë pararendëse, njoftim për sa do të zhvillohet në një seancë tjetër, që do të jetë me siguri ajo e datës 30 korrik, dhe më “kryesorja”, do të zgjidhen anëtarët zëvendësues të komisioneve të përhershme parlamentare, një procedurë rutinë, aspak e domosdoshme për sa kohë që Parlamenti dhe komisionet marrin pushimet.
Atëherë, pse do të mblidhen deputetët që në të “gdhirë” të ditës së nesërme në Parlament?
Nga “fronti” i protestës, që mendojnë se nesër Parlamenti do të mblidhet për vendime të rëndësishme, është njoftuar “Kuvend-Rrethim”, por me sa duket ky është një rreng i “ushtrisë” parlamentare.
Deputetët do të mblidhen për një seancë të panevojshme për të ruajtur atë të rëndësishmen për datën 30, ditën e enjte. Në ditën e fundit të sezonit veror, Parlamenti do të mblidhet për të miratuar të gjitha projektrezolutat e institucioneve të pavarura, si dhe për t’i dëgjuar krerët e këtyre institucioneve, mes të cilëve edhe SPAK.
Por si do të futet në Parlament kreu i SPAK, kur turma me protestues do të thërrasë: “Arrestoje Ramën, arresto Belindën!!”?
Testi për të enjten është nesër. Rrëmuja do të favorizonte të rrethuarit deputetë. Policia do të arrestonte organizatorët e ushtrisë së “Flamingove”, që mund të shkaktonin një mësymje të patolerueshme nga “ligji” dhe qetësia publike. Komisariatet do të mbusheshin plot. Të pabindurit do të liroheshin vetëm pas 72 orëve, kur të dilnin në gjykatë. Shumë mund edhe të mos dilnin.
E enjtja do t’i printe ushtrisë parlamentare që do të “çante” rrethimin me dinakëri dhe strategji…
Ajo do të shkonte me pushime, ndërsa Flamingot do të “lёpinin” plagët e ditëve të fundit të korrikut.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
