Marrëveshja e huasë prej 302 milionë eurosh me Shtetet e Bashkuara për blerjen e pajisjeve ushtarake po shoqërohet me një debat që ka pak lidhje me përmbajtjen e saj dhe shumë me mënyrën se si qeveria po kërkon ta kalojë në Kuvend.
Në qendër të kritikave nuk është marrëveshja me SHBA, por procedura. Dokumenti është klasifikuar, deputetët nuk kanë pasur kohë të njihen me të dhe megjithatë mazhoranca kërkon ta ratifikojë menjëherë. Një praktikë që opozita e cilëson antikushtetuese dhe në kundërshtim me vetë Rregulloren e Kuvendit, e cila parashikon se deputetët nuk mund të votojnë një projektakt pa pasur mundësinë të njihen paraprakisht me përmbajtjen e tij.
Sipas Partisë Demokratike, nuk ekziston asnjë urgjencë që ta justifikojë këtë procedurë. Vetë qeveria e ka miratuar marrëveshjen në parim që më 19 qershor, çka do të thotë se ka pasur më shumë se pesë javë kohë për t’ia përcjellë Kuvendit dhe për të respektuar afatet normale parlamentare. Për demokratët, përdorimi i procedurave të jashtëzakonshme nuk lidhet me interesin kombëtar apo me kërkesë të aleatit amerikan, por vetëm me mënyrën se si qeveria ka zgjedhur të funksionojë.
Nuk është hera e parë që ndodh. Sa herë në mes është një marrëveshje me Shtetet e Bashkuara, Edi Rama duket se e konsideron rëndësinë e aleancës si një leje për të kaluar edhe mbi Kushtetutën, edhe mbi Rregulloren e Kuvendit.
Nga ana tjetër, edhe qëndrimi i Partisë Demokratike nuk del nga skema e njohur e viteve të fundit. Demokratët deklarojnë se janë kundër mënyrës se si po sillet qeveria, por njëkohësisht nxitojnë të sqarojnë se nuk janё kundёr marrëveshjes. Madje propozojnë vetëm shtyrjen e ratifikimit për në fund të javës, në mënyrë që deputetët të njihen me dokumentin dhe më pas ta miratojnë. Edhe këtë herë, opozita kujdeset të mos krijojë as perceptimin më të vogël se po pengon një marrëveshje me Shtetet e Bashkuara, duke e kufizuar kundërshtimin vetëm te procedura.
Më poshtë deklarata e plotë e Partisë Demokratike:
PO marrëveshjes me SHBA!
JO mënyrës antikushtetuese se si Edi Rama kërkon ta miratojë brenda ditës në Parlament!
Ky është qëndrimi i opozitës në Kuvendin e Shqipërisë, për marrëveshjen e huasë prej 302 milionë eurosh që Shqipëria merr nga SHBA për financimin e blerjes së pajisjeve ushtarake.
Shqipëria ka nevojë të rrisë investimet në mbrojtje dhe të përmbushë detyrimet ndaj NATO-s, por, siç bën me çdo gjë që ka lidhje me SHBA, Edi Rama po bën pis edhe këtë marrëveshje, duke kërkuar që Kuvendi të shkelë Kushtetutën për të mbuluar dështimet e qeverisë së tij.
Çdo marrëveshje strategjike me aleatin tonë më të rëndësishëm meriton transparencë, debat dhe respektim të Kushtetutës, jo procedura të improvizuara antidemokratike, si ato që qeveria po imponon me dhunën e kartonit dhe që e kthejnë Kuvendin në noter të qeverisë.
Kjo nuk është urgjencë as e Shqipërisë, as e SHBA-së. Është urgjencë e një qeverie që për vite zgjodhi korrupsionin në vend të përmbushjes së detyrimeve ndaj Aleancës dhe sot kërkon të mbulojë dështimet e veta duke shkelur Kushtetutën.
Partia Demokratike e anëtarësoi Shqipërinë në NATO. Ne e pranojmë këtë marrëveshje në parim, por nuk do të pranojmë kurrë që marrëdhëniet strategjike me Shtetet e Bashkuara të përdoren si justifikim për të shkelur Kushtetutën.
Aleanca me SHBA forcohet duke respektuar ligjin, jo duke e shkelur atë. Ne na duhet standardi i anëtarëve të Kongresit amerikan, jo standardi i Taulant Ballës dhe Edi Ramës.
Me qëllim që të zbatohet Kushtetuta, kemi propozuar që sot sëbashku të miratojmë shqyrtimin me procedurë të përshpejtuar, të marrim marrëveshjen për ta shqyrtuar duke garantuat mospublikimin, dhe kemi propozuar që miratimi të bëhet të premten, ku grupet tona parlamentare garantuan prezencën e tyre dhe voton pro marrëveshjes. Kryetari i Kuvendit ra në parim dakord dhe më pas kjo u pengua nga Edi Rama.
Por Edi Rama e ka zeruar Kushtetutën dhe Parlamentin. Qëllimi i tij është të poshtëroje institucionet e vendit. Është fakt që Qeveria e ka miratuar marrëveshjen në parim në datën 19 Qershor 2026 dhe ka patur 5 javë kohë për ta sjell për ratifikim në Kuvend.
Ne i qëndrojmë propozimit tonë konstruktiv që deputetëve tu jepet mundësia të njihen me marrëveshjen dhe miratimi i saj të bëhet në një seancë plenare të posaçme ditën e premte të kësaj jave.
