UNESCO ka përfshirë në Listën e Trashëgimisë Botërore dy prej vendeve më simbolike të Francës: plazhet e Zbarkimit të Normandisë, ku aleatët nisën ofensivën vendimtare kundër Gjermanisë naziste gjatë Luftës së Dytë Botërore, si dhe kështjellat mbretërore të rajonit Languedoc.
Vendimi u miratua gjatë sesionit të 48-të të Komitetit të Trashëgimisë Botërore të UNESCO-s, që po zhvillohet në Busan të Koresë së Jugut.
Në listë u përfshi shtrirja prej afro 80 kilometrash e plazheve në departamentet Manche dhe Calvados, ku më 6 qershor 1944 u zhvillua zbarkimi historik i forcave aleate, një operacion që hapi rrugën për çlirimin e Evropës Perëndimore nga pushtimi nazist.
Po ashtu, UNESCO njohu si trashëgimi botërore edhe Kështjellat Mbretërore Kapetiane të Languedoc, një kompleks fortesash mesjetare në departamentet Aude dhe Ariège.
Të ndërtuara kryesisht në shekullin XIII, këto fortesa njihen edhe si “Kështjellat Katari” dhe u ngritën ose u përforcuan për të mbrojtur territoret strategjike në jug të Francës gjatë Mesjetës.
Me këtë vendim, UNESCO vlerëson si rëndësinë historike të plazheve të Normandisë në historinë moderne të Evropës, ashtu edhe vlerat arkitekturore e kulturore të sistemit mbrojtës mesjetar të Francës jugore.
